Sipas informacioneve të publikuara dje në disa media në Shtetet e Bashkuara, pala amerikane është njoftuar se India nuk planifikon të përfshihet në blerjen e avionëve F-35. Gjatë vizitës së presidentit indian Narendra Modi në Shtëpinë e Bardhë në shkurt, amerikanët ofruan shitjen e F-35-ave për Forcën Ajrore Indiaze si pjesë e një partneriteti strategjik më të gjerë.
Në vend të kësaj, zyrtarët indianë kanë sinjalizuar se New Delhi mbetet i përkushtuar modelit të përbashkët të blerjes së teknologjisë dhe armatimit, i cili thekson ndarjen e teknologjisë, prodhimin vendor dhe zhvillimin e kapaciteteve të brendshme.
“Qeveria është më e interesuar për një partneritet të orientuar drejt projektimit dhe prodhimit të përbashkët të pajisjeve të mbrojtjes në vend,” tha një zyrtar indian, i paidentifikuar, për mediat amerikane.
India, në këtë kuadër, pranon blerje që përfshijnë shkëmbim teknologjish, duke mundësuar që pjesë të pajisjeve dhe teknologjisë të prodhohen në Indi.
Ndërkohë, Rusia në korrik ofroi një paketë të dyfishtë avionësh luftarakë: avionin e brezit të pestë Su-57E dhe shumëfunksionalin Su-35M për arritjen e superioritetit ajror.
Sipas burimeve të njohura me bisedimet, oferta ruse përfshin transferimin e plotë të teknologjisë për Su-57E, me montim vendas në fabrikën e Hindustan Aeronautics Limited në Nashik, ku janë ndërtuar tashmë mbi 220 avionë Su-30MKI.
Duke marrë parasysh të gjitha këto, administrata Modi është më e prirur për ofertën ruse, megjithëse India përdor në masë të konsiderueshme armë dhe pajisje nga SHBA-ja.
