Zyrtarë të lartë izraelitë të sigurisë u takuan të martën për të diskutuar mundësinë e dëbimit të palestinezëve nga Rripi i Gazës, pavarësisht se përpjekjet e mëparshme për zbatimin e planeve të tilla kanë dështuar disa herë, shkruan Haaretz.
Gazeta izraelite raporton se Shmuel Ben Ezra, kreu i Këshillit të Sigurisë Kombëtare, thirri një takim urgjent me zyrtarë nga sektori i mbrojtjes, për të diskutuar atë që u përshkrua si “nxitje e emigrimit vullnetar” nga Gaza.
Mes të ftuarve ishin përfaqësues të ushtrisë izraelite, Shin Betit dhe Mossadit.
Gjatë takimit, përfaqësuesit e Mossadit thuhet se deklaruan se kjo agjenci nuk ka identifikuar asnjë shtet të gatshëm të pranojë palestinezë nga Gaza.
Zyrtarë nga sektori i mbrojtjes i thanë Haaretz-it se ishin të befasuar nga urgjenca e diskutimit, duke theksuar se kjo çështje është ngritur disa herë edhe më parë, por pa asnjë përparim.
“Deri më tani nuk dimë për asnjë shtet në botë që është i gatshëm të pranojë palestinezë që vendosin të largohen nga Rripi i Gazës. Gjithashtu, nuk dimë për ndonjë ndryshim që do ta mundësonte një hap të tillë pa koordinim të ndërlikuar mes aktorëve ndërkombëtarë”, tha një zyrtar.
Një burim i sigurisë i tha gjithashtu gazetës se nuk mund të përjashtohet mundësia që diskutimi i ripërtërirë të jetë pjesë e një pakete “kompensuese” që presidenti amerikan Donald Trump i ka dhënë kryeministrit Benjamin Netanyahu pas marrëveshjes amerikano-iraniane.
Një anëtar i Komisionit për Punë të Jashtme dhe Mbrojtje të Knessetit i tha Haaretz-it se çdo plan i tillë nuk ka “zbatueshmëri politike apo ndërkombëtare”, duke përmendur kundërshtimin e shteteve arabe dhe të komunitetit më të gjerë ndërkombëtar.
Ideja për largimin me forcë të palestinezëve nga Gaza është promovuar disa herë në diskursin politik izraelit që nga tetori i vitit 2023.
Zyrtarë të lartë, përfshirë Netanyahun, ministrat Israel Katz, Bezalel Smotrich dhe Itamar Ben Gvir, e kanë mbështetur publikisht këtë koncept, ndërsa retorikë e ngjashme është shfaqur edhe brenda partisë Likud të Netanyahut.
Katz në vitin 2025, në kuadër të ministrisë së tij, themeloi një drejtori për “emigrimin vullnetar” të banorëve të Gazës, ndërsa ministri izraelit i Mbrojtjes muajin e kaluar deklaroi se dëbimi i popullsisë palestineze do të zbatohet në momentin e duhur.
Sipas një ankete të Institutit për Politikën e Popullit Hebre nga viti i kaluar, më shumë se 70 për qind e votuesve të Likudit e mbështesin idenë e dëbimit të popullsisë palestineze nga atdheu i saj.
Në Izrael, mbështetja për dëbimin e palestinezëve nuk kufizohet vetëm në Rripin e Gazës.
Nissim Vaturi, deputet i Likudit, të martën tha për Channel 14 News se hebrenjtë në Izrael “nuk do të mund të jetojnë këtu në paqe derisa t’i dëbojmë të gjithë arabët nga kjo zonë”, duke iu referuar Bregut Perëndimor të pushtuar.
“Atje nuk duhet të ketë fare arabë”, tha Vaturi, i cili mban postin e nënkryetarit të Knessetit.
“Duhet t’i forcojmë vendbanimet hebraike në Jude dhe Samari”, tha Vaturi, duke përdorur emërtimin izraelit për Bregun Perëndimor, dhe shtoi se “vetëm në këtë mënyrë do të mund të jetojmë këtu, në tokën e Izraelit”.
Sipas nënkryetarit të Knessetit, tani duhet të diskutohet “se prej nga duhet të largohen arabët dhe ku duhet të vendosen hebrenjtë”.
“Kjo është ajo që duhet bërë për ta forcuar Izraelin. Nuk ka rrugë tjetër; të gjithë ata duhet të dëbohen nga këtu”, shtoi Vaturi, duke iu referuar palestinezëve.
Kjo nuk është hera e parë që deputeti i Likudit shpreh mbështetje për dëbimin e palestinezëve. Në nëntor ai tha se Meir Kahane, rabini ultranacionalist që bënte thirrje për dëbimin e palestinezëve nga Izraeli, kishte pasur të drejtë.
Vaturi gjithashtu ka deklaruar se Izraeli duhet “t’i ndajë fëmijët dhe gratë dhe t’i vrasë të rriturit në Gazë”, ndërsa pas sulmit të 7 tetorit të udhëhequr nga Hamasi bëri thirrje që “Gaza të digjet”.
