Ndërsa sulmet e pandërprera të Izraelit vazhdojnë dhe katastrofa humanitare në Gaza thellohet, Lëvizja Hamas u ka bërë thirrje botës islame dhe të gjithë njerëzve të lirë në mbarë botën të marrin pjesë në një “grevë globale për Gazën”.
Në deklaratën e Hamasit thuhet: “Thërrasim kombin arab dhe islam, si edhe të gjithë njerëzit e lirë të botës, që të marrin pjesë fuqishëm nesër në grevën globale për mbështetje ndaj Gazës.”
“DITA E ZEMËRIMIT GLOBALE”
Në deklaratë theksohet se greva ka për qëllim shprehjen e solidaritetit kundër sulmeve të Izraelit që vazhdojnë tashmë 22 muaj, ndërsa aksioni do të zhvillohet nën moton “Dita e Zemërimit Globale”.
Përveç grevës, Hamasi ka kërkuar që të premten, të shtunën dhe të dielën (22–24 gusht) të organizohen marshime dhe protesta masive në qytete dhe kryeqytete në mbarë botën.
THIRRJE PËR PROTESTA PARA AMBASADAVE
Në deklaratë thuhet:
“Duhet shtuar numri i protestave dhe i uljeve para ambasadave të SHBA-së, Izraelit dhe vendeve që mbështesin Tel Avivin.”
Hamasi gjithashtu paralajmëroi se ushtria izraelite planifikon të ripushtojë qytetin e Gazës dhe të detyrojë mbi një milion palestinezë të zhvendosen me forcë, duke e quajtur këtë si “një fazë të re të luftës gjenocidale”.
Lëvizja u bëri thirrje gjithashtu organizatave ndërkombëtare të veprojnë urgjentisht për “të ndaluar masakrat, për t’i dhënë fund bllokadës dhe urisë së qëllimshme sistematike”.
