Ministri i Jashtëm i Gjermanisë, Johann Wadephul, tha se vendi i tij mund të luajë një rol të rëndësishëm në ofrimin e garancive të sigurisë për Ukrainën, por Berlini me shumë gjasë nuk ka kapacitet të dërgojë trupa në një vend të përfshirë nga lufta.
“Ne jemi i vetmi vend që japim trupa për një brigadë luftarakisht të gatshme në Lituani. Të bëjmë këtë dhe njëkohësisht të stacionojmë trupa në Ukrainë me gjasë do të ishte tepër për ne,” tha Wadephul në podcastin Table Today të hënën, duke shtuar se ministri i mbrojtjes Boris Pistorius do të merret me këtë çështje.
Liderët evropianë e konsiderojnë se garancitë e qëndrueshme të sigurisë për Ukrainën janë kyçe për çdo marrëveshje të mundshme paqeje mes Kievit dhe Moskës, dhe kjo çështje do të jetë një nga temat kryesore në rendin e ditës kur presidenti ukrainas Volodimir Zelenski dhe homologët e tij evropianë të takohen me presidentin amerikan Donald Trump në Washington.
“Tani po dëgjojmë sinjale nga Washingtoni se ata janë të gatshëm të ofrojnë garanci sigurie, dhe kjo pastaj duhet të punohet bashkë me evropianët, ku Gjermania, sigurisht, duhet të luajë një rol të rëndësishëm,” tha Wadephul në intervistë, duke shtuar se Berlini mund të ofrojë ndihmë ushtarake dhe teknike, ndër të tjera.
Në një intervistë për Fox News të dielën, i dërguari i posaçëm i Trumpit, Steve Witkoff, tha se ekziston mbështetje për “garanci shumë më të forta të sigurisë dhe pranimin në BE”, duke sugjeruar se në tavolinë është edhe mbrojtja “e ngjashme me Nenin 5”, duke aluduar në klauzolën e NATO-s për mbrojtje të përbashkët.
Megjithatë, mbetet e paqartë nëse Zelenski do ta konsiderojë një premtim “të ngjashëm me Nenin 5” si mjet të mjaftueshëm për parandalim pa prani trupash në terren, veçanërisht pasi Trump më parë ka shprehur dyshime për angazhimin e SHBA-ve ndaj kësaj klauzole të NATO-s.
Kancelari konservator gjerman Friedrich Merz, i cili gjithashtu po udhëton për në Washington, deri tani ka qenë i paqartë lidhur me mundësinë e dërgimit të trupave gjermane në Ukrainë.
Në një intervistë menjëherë pas zgjedhjeve në shkurt, ai sugjeroi se Gjermania mund të merrte pjesë nëse këtë do ta bënte Amerika.
Por, pavarësisht rritjes masive të shpenzimeve ushtarake, Gjermania po përballet me vështirësi në rekrutimin dhe trajnimin e ushtarëve të gatshëm për luftë, me numrin e trupave që mbetet rreth 182.000, pavarësisht përpjekjeve të mëdha për zgjerimin e ushtrisë.
Në prill, Gjermania zyrtarisht nisi dislokimin e saj të parë të përhershëm jashtë vendit që nga Lufta e Dytë Botërore – një brigadë të blinduar me 5.000 ushtarë në Lituani, të destinuar për forcimin e krahut lindor të NATO-s si përgjigje ndaj luftës së Rusisë kundër Ukrainës.
“Çështja e garancive të sigurisë është jashtëzakonisht komplekse dhe do të kërkojë një shkallë të lartë koordinimi. Detajet specifike dhe zbatimi konkret i shohim si pjesë e një procesi realisht të gjatë dhe kompleks,” tha një zëdhënës i qeverisë gjermane para takimeve në Washington.
