Gjermania po përgatitet për një valë blerjesh miliarda dollarëshe armësh, përfshirë 20 avionë Eurofighter, deri në 3.000 automjete të blinduara të tipit Boxer dhe madje 3.500 automjete luftarake këmbësorie Patria, raporton Reuters.
Këto blerje janë pjesë e përpjekjeve të kancelarit Friedrich Merz për të ndërtuar ushtrinë konvencionale më të fuqishme në Evropë, me qëllim uljen e varësisë nga aleati gjithnjë e më i paparashikueshëm, SHBA-të, dhe marrjen e përgjegjësisë më të madhe për sigurinë evropiane.
Në fillim të këtij viti, Merz siguroi mbështetjen parlamentare për të përjashtuar shpenzimet për mbrojtjen nga kufizimet kushtetuese të huamarrjes, gjë që qeverisë së tij i mundëson financimin e reformës ushtarake.
Parashikohet që buxheti i rregullt gjerman për mbrojtjen të rritet në rreth 83 miliardë euro në vitin 2026, një rritje prej 20 miliardë eurosh krahasuar me 2025.
Vetëm porosia e avionëve Eurofighter vlerësohet ndërmjet katër dhe pesë miliardë eurosh, ndërsa çmimi i automjeteve Boxer, të prodhuara nga KNDS dhe Rheinmetall, llogaritet rreth 10 miliardë eurosh. Automjetet Patria vlerësohen afërsisht në shtatë miliardë euro.
Ministria e Mbrojtjes po ecën përpara edhe me planet për blerjen e sistemeve shtesë të mbrojtjes ajrore IRIS-T dhe disa qindra platformave SkyRanger për mbrojtje nga dronët, edhe pse detajet financiare të këtyre kontratave ende nuk janë finalizuar.
Merz ka premtuar të arrijë objektivin e ri të NATO-s për shpenzime prej 3.5% të PBB-së për mbrojtje deri në vitin 2029, shumë përpara shumicës së vendeve anëtare të aleancës.
Megjithatë, Gjermania ka ende shumë për të kompensuar. Disa orë pas pushtimit rus të Ukrainës, komandanti i ushtrisë gjermane shprehu publikisht frustrimin për shkak të viteve të neglizhencës në gatishmërinë luftarake, duke thënë se Bundeswehr “kishte mbetur më shumë e më pak me duar bosh.”
