– Pasi shkaktoi një katastrofë humanitare duke shtrënguar bllokadën e saj ndaj Gazës dhe duke penguar hyrjen e ndihmës humanitare, Izraeli shënjestroi tendat e palestinezëve civilë të zhvendosur
Pesëmbëdhjetë palestinezë, përfshirë gra dhe fëmijë, janë vrarë në sulmet e nisura nga ushtria izraelite në pjesë të ndryshme të Rripit të Gazës që nga orët e mëngjesit, transmeton Anadolu.
Pasi shkaktoi një katastrofë humanitare duke shtrënguar bllokadën e saj ndaj Gazës dhe duke penguar hyrjen e ndihmës humanitare, Izraeli shënjestroi tendat e palestinezëve civilë të zhvendosur.
Katër palestinezë, përfshirë një foshnjë dhe nënën e saj, u vranë kur ushtria izraelite bombardoi një shtëpi në lagjen Tel al-Hawa, në jugperëndim të qytetit të Gazës.
Një palestinez vdiq pasi ushtria izraelite shënjestroi shtëpinë e një familjeje në qytetin Deir al-Balah në Gazën qendrore.
Shumë njerëz u plagosën kur ushtria izraelite bombardoi shkollën Abu Halu, ku palestinezët e zhvendosur nga Kampi i Refugjatëve Bureyj po strehoheshin.
Një familje me katër anëtarë, e përbërë nga një nënë, një baba dhe dy fëmijë, humbën jetën pasi Izraeli shënjestroi një tendë palestinezësh të zhvendosur në zonën Mawasi të qytetit Khan Younis, në jug të Gazës.
Në sulmin e ushtrisë izraelite ndaj një tende që u përkiste palestinezëve të zhvendosur pranë Spitalit Nasser në Khan Younis u vranë 3 palestinezë.
Një palestinez u vra në sulmet e kryera nga ushtria izraelite në zonën e Xhamisë së Dëshmorëve në Khan Younis.
Në Mewasi, shumë palestinezë u plagosën si pasojë e sulmit izraelit ndaj tendave.
Dy persona u vranë kur ushtria izraelite shënjestroi një grup palestinezësh në Khan Younis.
