– Raportohet se Franca do të marrë masat më të mëdha paraprake për të garantuar sigurinë e popullsisë gjatë këtyre operacioneve.
Transmetuesi francez BFM TV njoftoi se Franca do të bëjë dërgesa ndihmash humanitare nga ajri në Rripin e Gazës në ditët në vijim për të ndihmuar në zbutjen e krizës humanitare, transmeton Anadolu.
Vendimi vjen ndërsa Rripi i rrethuar përballet me atë që Klasifikimi i Fazës së Integruar të Sigurisë Ushqimore, një grup i mbështetur nga OKB-ja, e përshkruan si “skenari më i keq i urisë”.
Franca do të marrë “masat më të mëdha paraprake për të garantuar sigurinë e popullsisë gjatë këtyre operacioneve”, thanë burime diplomatike, duke iu referuar mbi 1.000 palestinezëve të vrarë nga forcat izraelite ndërsa kërkonin ushqim nga një plan ndihme i diskutueshëm i mbështetur nga SHBA-ja dhe Izraeli.
Autoritetet në Paris po shqyrtojnë gjithashtu mundësinë e transportimit të ndihmës në rrugë tokësore për të siguruar dërgesa më të shpejta dhe më të mëdha. Megjithatë, burimet theksuan se dërgesat nga ajri nuk janë zëvendësim për akses më të madh humanitar.
“Këto dërgesa ndihmash nga ajri nuk kanë për qëllim të zëvendësojnë një rritje të konsiderueshme të vëllimeve të ndihmës, gjë që do të kërkonte që Izraeli të hapte menjëherë pikat e kalimit tokësor”, tha një zyrtar.
Franca, së bashku me një mori vendesh të tjera, ka bërë thirrje të përsëritura për armëpushim dhe i ka kërkuar vazhdimisht Izraelit të hapë pikat e kalimit për të lejuar akses të papenguar humanitar.
Sipas Ministrisë së Shëndetësisë së Gazës, të paktën 147 persona kanë vdekur nga uria që nga tetori i vitit 2023 kur Izraeli filloi ofensivën e tij të pandërprerë përfshirë 88 fëmijë.
Duke refuzuar thirrjet ndërkombëtare për armëpushim, ushtria izraelite ka vrarë më shumë se 60.000 palestinezë, shumica prej tyre gra dhe fëmijë, në Gaza që nga tetori i vitit 2023. Bombardimet e pandërprera kanë shkatërruar enklavën dhe kanë çuar në një krizë të rëndë urie.
Të hënën, grupet izraelite të të drejtave B’Tselem dhe Mjekët për të Drejtat e Njeriut-Izrael akuzuan Izraelin për kryerjen e gjenocidit në Gaza, duke përmendur shkatërrimin sistematik të shoqërisë palestineze dhe çmontimin e qëllimshëm të sistemit të kujdesit shëndetësor të territorit.
