Kryeministri sllovak Robert Fico gjatë shënimit të përvjetorit të Kryengritjes Popullore Sllovake (SNP) të premten citoi udhëheqësin nazist Adolf Hitler. Njëkohësisht mbrojti vizitën e tij të këtij viti në Moskë, si dhe udhëtimin e planifikuar në Kinë.
Në fjalimin me rastin e festës kombëtare të Kryengritjes Popullore Sllovake – kryengritje e forcave antifashiste në Sllovaki në fund të Luftës së Dytë Botërore – Fico e nisi paraqitjen e tij në skenën e Banska Bystrica duke kujtuar Hitlerin, ndonëse vetë pranoi se “nuk do të duhej ta përmendte”.
“Kufiri midis Evropës dhe Azisë nuk është Urali, por ndodhet aty ku përfundojnë fiset gjermanike dhe ku fillojnë sllavët. Këtë kufi duhet ta shtyjmë sa më larg në lindje. Vetë historia i ka dhënë të drejtën Gjermanisë që t’i nënshtrojë të gjithë ata popuj më pak të vlefshëm, t’i pushtojë dhe t’i shfrytëzojë për punë në dobi të perandorisë gjermane,” parafrazoj Fico fjalët e Hitlerit, duke theksuar se dëshironte të tregonte dhe kujtonte qëndrimet naziste ndaj sllavëve.
Pas kësaj, ai dënoi fashizmin dhe theksoi se kërcënimi nuk ishte zhdukur kurrë plotësisht – sipas tij, ai thjesht ishte fshehur gjatë Luftës së Ftohtë.
Fico theksoi rëndësinë e SNP-së dhe lirisë që, sipas tij, i erdhi Sllovakisë falë Bashkimit Sovjetik, duke bërë thirrje për ruajtjen e një politike “madhështore, sovrane dhe sllovake”.
Kryeministri më tej mbrojti vizitën e tij të këtij viti në Moskë për festimin e përfundimit të Luftës së Dytë Botërore, ku ishte i vetmi politikan i lartë nga Bashkimi Evropian. Atje ai u takua edhe me liderin rus Vladimir Putin, i cili ka nisur pushtimin e Ukrainës që po zgjat tashmë tre vjet.
Fico, i cili për shkak të qëndrimeve të tij pro-ruse shpesh është në shënjestër kritikash si brenda vendit ashtu edhe në arenën ndërkombëtare, deklaroi se askush nuk do t’i diktojë drejtimin e politikës së tij të jashtme.
“E vlerësoj çdo sakrificë individuale të Luftës së Dytë Botërore,” tha ai.
Gjatë fjalimit festiv, ai kritikoi edhe kundërshtarët e tij politikë, të cilët i quajti “shërbëtorë sllovakë”, dhe konfirmoi pjesëmarrjen e planifikuar në festimet e përfundimit të luftës në Kinë. Aty, siç është paralajmëruar, ai pritet të takohet përsëri me Putinin javën e ardhshme, ndërsa pritet edhe ardhja e diktatorit koreano-verior Kim Jong-un.
