Fidan theksoi se Turqia iu bashkua një nisme ndërkombëtare në OKB, së bashku me 52 shtete, me të cilën kërkohet ndalimi i furnizimit me armë dhe municione që, siç tha ai, “nxisin operacionet ushtarake izraelite”.
Gjatë seancës së jashtëzakonshme të parlamentit turk, ministri i jashtëm paraqiti qëndrime të ashpra për zhvillimet aktuale rajonale, veçanërisht për luftën në Gaza. Ai vlerësoi se Izraeli prej dy vitesh po kryen gjenocid ndaj palestinezëve, duke injoruar vlerat themelore humanitare.
“Krimet në Gaza janë shënuar si një nga kapitujt më të errët në historinë e njerëzimit. T’i lejohet Izraelit të vazhdojë sulmet e pamëshirshme në Gaza dhe në të gjithë Palestinën nuk do të ndikojë vetëm mbi palestinezët, por rrezikon të ndezë tërë rajonin,” tha Fidan.
Ai shtoi se rezistenca palestineze do të ndryshojë rrjedhën e historisë, do të bëhet simbol i luftës së të shtypurve dhe do të tronditë themelet e, siç tha ai, “rendit botëror në shkatërrim”. Në veçanti theksoi se Turqia refuzon çdo plan që parashikon shpërnguljen e palestinezëve nga Gaza, pa marrë parasysh nga kush vjen një propozim i tillë.
Duke folur për kontekstin më të gjerë, Fidan nënvizoi se Ankaraja nuk do të lejojë që komunitetet siriane të keqpërdoren me qëllim minimin e integritetit territorial të atij vendi.
“Turqia ka ndërprerë gjithë tregtinë me Izraelin, ka ndaluar ankorimin e anijeve turke në portet izraelite dhe ka mbyllur hapësirën ajrore për avionët izraelitë. Sulmet izraelite ndaj Gazës, Libanit, Jemenit, Sirisë dhe Iranit janë shenja më e qartë e një mentaliteti terrorist që sfidon rendin ndërkombëtar,” theksoi Fidan.
