Edhe nga orbita, shenjat e vuajtjes dhe dëshpërimit janë të dukshme. Të shtunën, një satelit që fluturoi mbi Rripin e Gazës kapoi një pamje me mijëra njerëz që tuboheshin rreth një konvoi kamionësh me ndihma, duke u përpjekur të përparonin përmes grumbujve të rrënojave në pjesën jugore të territorit.
Kjo nuk është hera e parë që kamionët hyjnë në Rripin e Gazës, por për shkak të bllokadës izraelite, palestinezët në Gaza janë më të uritur se kurrë, dhe janë regjistruar shumë raste vdekjeje për shkak të urisë.
Palestinezë janë vrarë duke u përpjekur të arrijnë për ndihma ushqimore. Disa ranë nën plumbat izraelitë kur u përpoqën të marrin ndihma në pika shpërndarjeje që tani funksionojnë në terren. Të tjerë u qëlluan ndërsa sulmonin kamionët me ndihma sapo kaluan kufirin. Më herët këtë muaj, të paktën 20 vetë humbën jetën në një shtytëmarrje masive në një pikë shpërndarjeje ndihmash.
Mercenarë amerikanë kanë përshkruar se ata dhe ushtria izraelite kanë qëlluar palestinezë që po kërkonin ndihmë.
Ndërsa shumë banorë të Gazës kalojnë me guxim nëpër kaosin e përpjekjeve frenetike për të ushqyer familjet e tyre, shpesh kthehen në shtëpi me duar bosh.
Disa nga ata që dalin “fitimtarë” me, për shembull, një qese miell, kanë motive tregtare: ata transportojnë mallin për ta shitur në tregje. Çmimet atje janë shpesh tepër të larta, por shumë banorë të Gazës—të moshuar ose të dobët, ose tepër të frikësuar për të rrezikuar turmën—nuk kanë alternativë tjetër veçse të paguajnë.
Diçka e panjohur mbetet për dhjetëra kamionë ndihmash të kapur nga sateliti, fotot e të cilëve u publikuan të hënën nga Planet Labs, një kompani komerciale për imazhe satelitore të Tokës. Ende nuk dihet saktësisht çfarë po transportonin dhe në cilën drejtim po udhëtonin para se të përfshiheshin në atë turmë, raporton New York Times.
Video të incizuara nga toka rreth të njëjtës kohë tregojnë turma të mëdha burrash që shtyhen dhe rrotullohen rreth kamionëve. Dëgjohen dhjetëra burra që ngjiten në anët e mjeteve për t’u afruar tek ngarkesa. Duket njerëz që dalin me kuti, përfshirë një kuti të mbishkruar “ushqime”.
Pamjet tokësore janë bërë afër 300 metra veriore të korridorit Morag, zonë e krijuar nga ushtria izraelite që ndan Khan Yunis nga Rafah. Ky është po ai vend që shihet edhe nga sateliti.
Nga ajri, shumë kamionë janë kaq të mbipopulluar me njerëz sa vështirë njihen. Por edhe nga toka, ata mezi duken.
