Ish-kreu i Bankës Qendrore Evropiane dhe ish-kryeministri i Italisë, Mario Draghi, paralajmëroi të premten se Bashkimi Evropian duhet të mbrojë më mirë veten në një botë të re të dominuar nga lufta dhe gjeopolitika e pamëshirshme.
“Për vite me radhë, Bashkimi Evropian ka besuar se madhësia e tij ekonomike, me 450 milionë konsumatorë, i sillte fuqi gjeopolitike dhe ndikim në marrëdhëniet ndërkombëtare tregtare. Ky vit do të mbahet mend si viti kur ajo iluzion u zhduk”, tha Draghi në takimin vjetor në Rimini, një ngjarje kyçe në politikën italiane e lidhur me shoqatën katolike.
Draghi, i cili vitin e kaluar hartoi raporte me ide për përshpejtimin e rritjes ekonomike të bllokut, theksoi se BE-ja duhet të përshtatet nëse dëshiron të mbijetojë.
Sipas tij, sfida kryesore erdhi nga “një thirrje shumë brutale për t’u zgjuar nga Trumpi”.
“Duhej të pajtoheshim me tarifat që vendosi partneri ynë më i madh tregtar dhe aleati afatgjatë, Shtetet e Bashkuara të Amerikës. I njëjti aleat na shtyu të rrisim shpenzimet ushtarake, një vendim që ndoshta do të duhej ta merrnim gjithsesi – por në mënyra që me gjasë nuk pasqyrojnë interesat e Evropës,” tha ai.
Megjithë fuqinë e saj ekonomike, BE-ja luajti vetëm një rol “margjinal” në përpjekjet paqësore të Trumpit në Ukrainë, ishte “spektatore” e masakrës në Gaza dhe “Kina e bëri të qartë se nuk e sheh Evropën si partnere të barabartë”.
“Evropa është keq e pajisur në një botë ku gjeoekonomia, siguria dhe stabiliteti i burimeve të furnizimit – dhe jo më efikasiteti – frymëzojnë marrëdhëniet tregtare ndërkombëtare. Organizimi ynë politik duhet të përshtatet me kërkesat e kohës kur ato janë ekzistenciale,” tha ai.
Duke iu kthyer thirrjes së tij të njohur për forcimin e konkurrueshmërisë së Evropës, Draghi theksoi se sipas Fondit Monetar Ndërkombëtar, nëse barrierat e brendshme të BE-së do të uleshin në nivelin që ekziston në SHBA, produktiviteti i punës së bllokut do të mund të ishte rreth 7% më i lartë pas shtatë vjetësh.
Ai shtoi se këto barriera të brendshme gjithashtu e bëjnë më pak efikase ndërtimin e mbrojtjes evropiane. Edhe pse vendet e BE-së synojnë të rrisin investimet e tyre ushtarake me 2 trilionë euro deri në vitin 2031,
“Ne kemi barriera të brendshme që imponojnë tarifa 64% mbi pajisjet dhe 95% mbi metalet. Kjo sjell tenderë më të ngadaltë, kosto më të larta dhe më shumë furnizime nga shitës jashtë Bashkimit Evropian,” tha ai.
Draghi kërkoi që blloku të emetojë borxh të përbashkët për të rritur shpenzimet në mbrojtje, kërkim-zhvillim, infrastrukturë të përbashkët dhe teknologji të reja transformuese – propozim që deri tani ka hasur në rezistencë nga të ashtuquajturat vende kursimtare.
