Një flotilje masive civile, ku marrin pjesë aktivistë nga 44 vende, pritet të niset drejt Gazës në fund të gushtit, në atë që organizatorët e përshkruajnë si përpjekjen më të madhe deri më sot për të sfiduar bllokadën izraelite, e cila e ka çuar popullsinë e enklavës buzë urisë.
Duke folur në një konferencë për shtyp në Tunizi, të organizuar nga Koordinimi i Përbashkët i Aksionit për Palestinën, anëtarët e Global Sumud Flotilla thanë se pjesëmarrësit synojnë të thyejnë bllokadën, të krijojnë një korridor humanitar dhe të tërheqin vëmendjen ndaj asaj që e quajnë “gjenocidi i vazhdueshëm” ndaj palestinezëve.
“Këtë verë, dhjetëra anije, të mëdha e të vogla, do të nisen nga portet në mbarë botën, duke iu afruar Gazës në flotiljen më të madhe civile të këtij lloji në histori,” tha organizatorja Haifa Mansouri.
Iniciativa bashkon katër lëvizje: Maghreb Sumud Flotilla, Global Gaza Movement, Freedom Flotilla Coalition dhe Sumud Nusantara.
Konvoji i parë do të niset nga portet spanjolle më 31 gusht, ndërsa i dyti nga portet tuniziane më 4 shtator. Më shumë se 6.000 aktivistë janë regjistruar për t’iu bashkuar, dhe përgjatë rrugës janë planifikuar trajnime, aktivitete solidariteti dhe kampe, sipas organizatorit Seif Abu Keshk.
Ky njoftim vjen pas ndërhyrjes së forcave detare izraelite më 26 korrik, kur ndaluan anijen humanitare Handala teksa i afrohej Gazës, duke e shoqëruar deri në portin Ashdod. Anija kishte arritur rreth 70 milje detare nga enklava, duke tejkaluar distancën e përshkuar nga anija Madleen, e cila kishte arritur 110 milje para se të ndalohej, sipas Komitetit Ndërkombëtar për Fundin e Bllokadës së Gazës.
Duke hedhur poshtë thirrjet ndërkombëtare për armëpushim, Izraeli ka vazhduar ofensivën e tij ushtarake në Gazë që nga 7 tetori 2023, duke vrarë pothuajse 61.000 palestinezë, gati gjysmën e të cilëve gra e fëmijë. Fushata ka shkatërruar territorin dhe e ka çuar atë në prag të urisë.
Në nëntorin e kaluar, Gjykata Penale Ndërkombëtare lëshoi urdhra arresti për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit. Izraeli po përballet gjithashtu me një padi për gjenocid në Gjykatën Ndërkombëtare të Drejtësisë.
