Administrata e presidentit amerikan Donald Trump po shqyrton propozime për rindërtimin pasluftës në Gazë, përfshirë edhe atë që parashikon vendosjen e një kontrolli të përkohshëm amerikan dhe pagesën e rreth një të katërtës së popullsisë për t’u zhvendosur, raporton Washington Post.
Sipas dokumentit prej 38 faqesh për projektin “GREAT Trust” – shkurtim i “Gaza Reconstruction, Economic Acceleration and Transformation” (Rindërtimi, Përshpejtimi Ekonomik dhe Transformimi i Gazës) – parashikohet që Gazën ta administrojnë amerikanët për rreth 10 vjet, “derisa politika palestineze e reformuar dhe e deradikalizuar të jetë e gatshme të marrë këtë rol”. Në atë periudhë, territori do të shndërrohej në një qendër turizmi dhe prodhimi të teknologjisë së lartë.
Pagesa për ata që largohen
Plani përfshin të paktën një zhvendosje të përkohshme të mbi 2 milionë banorëve të Gazës, brenda ose jashtë territorit, për t’i hapur rrugë rindërtimit. Llogaritet se 75% e banorëve do të qëndrojnë, ndërsa 25% do të largohen, nga të cilët 75% nuk do të kthehen më.
Ata që zgjedhin të largohen do të përfitonin:
- 5.000 dollarë në para të gatshme,
- subvencione për katër vite qiraje diku tjetër,
- si dhe ushqim për një vit.
Kush po e harton planin
Pas deklaratave të Trumpit në shkurt për emigracionin dhe rindërtimin e Gazës, një ekip nga Boston Consulting Group (BCG) në Washington – që ka punuar edhe me një fondacion humanitar për Gazën të mbështetur nga SHBA dhe Izraeli – ka zhvilluar “planifikim të detajuar dhe modelim financiar për GREAT Trust”. Dokumenti u përfundua në prill “me shumë pak ndryshime që atëherë”, sipas burimeve të gazetës.
Plani parasheh që, pasi Gaza të jetë “e demilitarizuar dhe e deradikalizuar”, kontrolli të kalohet tek një shtet palestinez i pavarur, i cili në fund do të bashkohej me Marrëveshjet e Abrahamit, të nënshkruara nga Trump në mandatin e tij të parë me disa shtete arabe.
Heshtje nga Uashingtoni
Shtëpia e Bardhë dhe Departamenti i Shtetit refuzuan të komentojnë për Washington Post. BCG tha se puna mbi këtë plan nuk është miratuar zyrtarisht dhe se dy partnerët e lartë që e kishin drejtuar projektin janë shkarkuar.
Takimi në Shtëpinë e Bardhë
Raporti vjen pas takimit të Trumpit të mërkurën në Shtëpinë e Bardhë me zyrtarë përfshirë sekretarin e shtetit Marco Rubio, të dërguarin special Steve Witkoff, ish-kryeministrin britanik Tony Blair dhe dhëndrin e Trumpit Jared Kushner, për të diskutuar rreth përfundimit të luftës në Gaza dhe hapave të ardhshëm.
Sipas The Times, Blair – i cili prej muajsh po përgatit një plan pasluftës për Gazën – i ka thënë Trumpit gjatë takimit se banorët e Gazës “me dëshpërim duan një udhëheqje të re dhe ëndërrojnë të bëhen Dubai i ardhshëm”.
