Është arrestuar Tania Gomez (33) nga Suedia, e cila për vite me radhë i ka shpëtuar me sukses policisë dhe ndaj saj ishte lëshuar një urdhër-arresti nga Interpoli.
Ajo ishte në kërkim që nga viti 2021 dhe mediat tabloide e kishin quajtur “mbretëresha e kokainës”. Gomez ndodhej në listën e Europolit si një nga të arratisurit më të kërkuar për trafik droge.
Para se të bëhej një figurë e njohur në botën e krimit të organizuar, Gomez ishte një influencere. Kalimi i saj nga një influencere në një tregtare droge i ka tronditur ndjekësit dhe adhuruesit e saj të mëparshëm.
Ajo akuzohet për veprimtari në një organizatë kriminale me qendër në Stokholm, e cila përdorej për pastrimin e parave të bandave suedeze.
Gomez ishte e njohur edhe si pronare e organizatës bamirëse për shpëtimin e qenve HundGarin.
Megjithatë, sipas Europolit, ajo është gjithashtu e lidhur me një rrjet të paligjshëm për posedimin dhe transportin e kafshëve jashtë vendit.
Autoritetet suedeze kërkojnë që ajo të dënohet me 14 vite burg për kontrabandë droge dhe pastrim parash.
