Anijet tregtare që ende lundrojnë në Detin e Kuq po transmetojnë mesazhe për kombësinë e tyre, madje edhe për besimin, përmes sistemeve të tyre publike të ndjekjes, për t’u shmangur që të jenë objekt sulmesh nga hutët jemenezë pas sulmeve vdekjeprurëse të kësaj milicie gjatë kësaj jave.
Deti i Kuq është një rrugë kyçe për naftë dhe mallra, por trafiku ka rënë papritur që kur sulmet e hutëve pranë bregut jemenez filluan në nëntor 2023, si shenjë solidariteti me palestinezët në luftën në Gaza, raporton Reuters.
Këta të fundit këtë javë fundosën dy anije pas një qetësie disa mujore, dhe udhëheqësi i tyre, Abdul Malik al-Huthi, ripërsëriti se nuk do të lejojnë asnjë anije që transporton mallra të lidhura me Izraelin.
Ditët e fundit, një numër gjithnjë e më i madh anijesh që kalojnë përmes pjesës jugore të Detit të Kuq dhe ngushticës Bab el-Mandeb kanë shtuar mesazhe në profilin e tyre publik AIS, të cilat duken kur klikohet mbi anije.
Mesazhet përfshinin në mënyrë të veçantë përmendje se ekuipazhi dhe drejtuesit janë tërësisht kinezë, si dhe tregimin e pranisë së rojeve të armatosura në bord. “E gjithë ekuipazhi mysliman,” thuhej në një mesazh, ndërsa të tjera theksonin qartë se anijet nuk kishin asnjë lidhje me Izraelin, sipas të dhënave të AIS nga MarineTraffic dhe LSEG.
Burimet e sigurisë detare thanë se ky është një tregues i dëshpërimit në rritje për t’u shmangur sulmit nga komandot e hutëve ose dronët vdekjeprurës, por gjithashtu menduan se ka pak gjasa që kjo të bëjë ndonjë ndryshim.
Përgatitja e të dhënave inteligjente nga hutët ishte “shumë më e thellë dhe e orientuar drejt të ardhmes,” tha një burim. Analiza e anijeve tregoi se flotat më të gjera të dy anijeve, të cilat hutët sulmuan dhe fundosën këtë javë, gjatë vitit të kaluar kanë ankoruar në porte izraelite.
Burimet e sigurisë detare thanë se edhe pse kompanitë anije-marrese duhet të rrisin kujdesin e duhur për çdo lidhje të rastit me Izraelin përpara se të lundrojnë në Detin e Kuq, rreziku i sulmit mbetet i lartë.
Në mars 2024, hutët goditën tankerën kinez “Huang Pu” me raketa balistike, pavarësisht se kishin thënë më parë se nuk do të sulmonin anijet kineze, njoftoi Komanda Qendrore e SHBA-së.
Hutët gjithashtu kanë synuar anije që tregtojnë me Rusinë.
“Pavarësisht pausave të shpallura të zjarrit, zona si Deti i Kuq dhe ngushtica Bab el-Mandeb vazhdojnë të konsiderohen me rrezik të lartë,” tha ndërmjetësi i sigurimeve Aon në një raport këtë javë. Numri i lundrimeve ditore përmes ngushticës, në majën jugore të Detit të Kuq dhe hyrjen në Gjirin e Adenit, ishte 35 anije më 10 korrik dhe 32 më 9 korrik, krahasuar me 43 më 1 korrik, sipas të dhënave të Lloyd’s List Intelligence.
Kjo mund të krahasohet me një mesatare ditore prej 79 lundrimesh në tetor 2023, para se të fillonin sulmet.
