Pas nisjes nga Qiproja, një anije e ngarkuar me 1.200 tonë furnizime ushqimore për Rripin e Gazës po i afrohet portit Ashdod në jug të Izraelit.
Anija nën flamurin panamez është ngarkuar me 52 kontejnerë që transportojnë ndihma ushqimore si makarona, oriz, ushqim për foshnja e fëmijë dhe mallra të konservuara.
Dogana izraelite kontrolloi ndihmat në portin qipriot Limassol, nga ku anija u nis të hënën.
Rreth 700 tonë ndihma vijnë nga Qiproja dhe janë blerë me paratë e dhuruara nga Emiratet e Bashkuara Arabe për fondin Amalthea, i krijuar vitin e kaluar.
Pjesa tjetër e ndihmës vjen nga Italia, një urdhër fetar katolik në Maltë dhe organizata joqeveritare kuvajtiane Al Salam Association.
Pas shkarkimit në portin izraelit, punonjësit humanitarë të OKB-së do të organizojnë transportin e ndihmave me kamionë deri në depot dhe qendrat ushqimore që menaxhohen nga World Central Kitchen, një organizatë jofitimprurëse që ka shpërndarë ndihma në Gaza.
Qiproja vitin e kaluar ishte pika e nisjes për 22.000 tonë ndihma të dorëzuara me anije direkt në Gaza, përmes një terminali të menaxhuar nga World Central Kitchen dhe një objekti ushtarak amerikan të njohur si Sistemi i Përbashkët Logjistik Bregdetar.
