Al Jazeera Balkans sot, në edicionin e lajmeve të orës 12:25, përfundoi zyrtarisht transmetimin e saj.
Prezantuesja Dalija Hasanbegović Konaković dha lajmet e fundit dhe, pas raportimit të ngjarjeve kryesore, iu drejtua audiencës:
“Të nderuar shikues, këto ishin lajmet e fundit të Al Jazeera Balkans. Faleminderit për besimin tuaj për gati 14 vjet. Jemi krenarë për çdo prej 4,970 ditëve që kemi shërbyer për ju… Me këtë ju përshëndesim nga studioja jonë qendrore në Sarajevo.”
Derisa të mbarojë korriku, AJB do të transmetojë përmbajtje të parapërgatitur, e më pas sinjali do të shuhet, duke shënuar përfundimin e projektit rajonal televiziv pas një historie 14-vjeçare.
Udhëheqja e Al Jazeerës në Doha nuk ka dhënë ende një shpjegim zyrtar për këtë vendim të vështirë, por mendohet se ai ka të bëjë me arsyet financiare të stacionit.
Gjatë këtyre 14 viteve, Al Jazeera Balkans është dalluar për programin origjinal dokumentar dhe për një sërë projektesh të tjera, duke qenë stacioni i parë që transmetoi në një gjuhë tjetër përveç arabishtes dhe anglishtes.
AJB mbuloi tregjet rajonale nga zyrat e saj në Beograd, Zagreb, Podgoricë, Shkup, Lubjanë dhe Prishtinë.
Stacioni u themelua në mes të shtatorit 2010, kur Al Jazeera bleu TV-ninë e atëhershme NTV Studio 99 në Sarajevo për 2.3 milionë KM, shuma e borxheve të saj ndaj shtetit.
Në vitin 2018, AJB krijoi festivalin e filmit dokumentar AJB DOC, që mbahet çdo shtator në Sarajevo.
