Transferimi i Nicolas Jackson nga Chelsea te Bayern mund të dështojë shumë lehtë në orët e ardhshme, pasi “Bluve” po e stopojnë marrëveshjen pas fatkeqësisë që pësuan në ndeshjen e sotme kundër Fulham-it.
Jackson sot kishte mbërritur në Mynih për kontrollet mjekësore, të cilat duhej t’i përfundonte para se huazimi te Bayern të bëhej zyrtar. Por, ndërkohë, Liam Delap u dëmtua në ndeshjen ndaj Fulham-it.
Delap pësoi një lëndim në muskujt e pasmë të kofshës dhe duket se e pret një pauzë më e gjatë. Menjëherë pas kësaj, Chelsea njoftoi Bayernin dhe agjentët e Jackson-it se nuk do ta realizojnë huazimin e senegalezit.
Lajmin e konfirmoi gazetari i besueshëm David Ornstein, ndërsa disa burime raportojnë se nga kampi i lojtarit kanë deklaruar se nuk pranojnë një skenar të tillë.
Më herët, klubet kishin arritur marrëveshje për huazimin e Jackson-it, për të cilin Bayern do të paguante 15 milionë euro, dhe më pas do të kishte mundësi ta blinte përfundimisht kartonin e lojtarit senegalez.
Çfarë do të ndodhë në fund, mbetet të shihet gjatë pjesës së mbetur të ditës dhe afatit kalimtar që është drejt fundit.
