Në një deklaratë me shkrim të bërë nga Zyra e Guvernatorit të Kudsit, u vu në dukje se rreth Kudsit gjenden 22 komunitete ku jetojnë afërsisht 7.000 palestinezë
Të paktën 7.000 palestinezë janë nën kërcënimin e migrimit të detyruar për shkak të projektit “E1” të Izraelit, i cili do të zgjerojë vendbanimet e uzurpuara nga palestinezët në Kudsin Lindor të pushtuar dhe do të ndajë veriun nga jugu i Bregut Perëndimor, transmeton Anadolu.
Në një deklaratë me shkrim të bërë nga Zyra e Guvernatorit të Kudsit, u vu në dukje se rreth Kudsit gjenden 22 komunitete ku jetojnë afërsisht 7.000 palestinezë.
Më tej u theksua se 7.000 njerëz në rajon përballen me rrezikun e zhvendosjes me forcë nëse zbatohet “projekti kolonial” që Izraeli e quan “E1”.
Gjithashtu vihet re se me këtë projekt, komuniteti palestinez në Jabal Baba dhe Wadi Jamal do të izolohet pothuajse plotësisht dhe do të shkëputet nga qyteza Azaria.
– Smotrich njoftoi se do të miratonte projektin “E1”
Ministri i Financave i ekstremit të djathtë i kabinetit izraelit, Bezalel Smotrich, njoftoi më 13 gusht se planifikon të miratojë projektin “E1”, i cili do të zgjeronte vendbanimet e sekuestruara nga palestinezët në Kudsin Lindor të pushtuar, me qëllim “eliminimin e idesë së një shteti palestinez”.
Projekti “E1” u lançua për të lidhur vendbanimin Maale Adumim të ndërtuar pranë lagjes palestineze Azaria, historikisht pjesë e Kudsit Lindor, por e vendosur në anën e Bregut Perëndimor të Murit të Ndarjes (Muri i Turpit), me rrugën që të çon në Kudsin Perëndimor.
Në këtë kuadër, 12.000 hektarë tokë palestineze u uzurpuan për të ndërtuar më shumë se 4.000 njësi banimi dhe hotele të paligjshme në rajon.
Me projektin “E1” synohet izolimi dhe shkëputja e lidhjes së Kudsit Lindor nga territoret palestineze në Bregun Perëndimor.
Këshilli i Lartë i Planifikimit i Administratës Civile të Izraelit do të mblidhet më 20 gusht për të dhënë miratimin përfundimtar për planin për ndërtimin e 3.401 njësive të paligjshme të banimit në kuadër të projektit “E1”.
