Momentet kur Turqia i siguroi ushqime dhe ilaçe Flotës Globale Sumud, e cila është nisur për të dërguar ndihma humanitare në Gaza, u filmuan nga ajri. Flotës, që po udhëtonte në Mesdhe në trekëndëshin midis Kretës, Qipros dhe Egjiptit, iu dërgua ndihma humanitare nga Turqia.
Ekipi i Gjysmëhënës së Kuqe Turke arriti deri tek anijet dhe dorëzoi ndihmat ushqimore dhe medicinale.
Operacioni i ndihmës u filmua gjithashtu nga ajri.
PASAGJERËT E ANIJES QË PO MERRTE UJË U EVAKUUAN
Anija “Johnny M” e Flotës Globale Sumud, e cila ishte nisur në Mesdhe për të dërguar ndihma humanitare në Gaza, bëri thirrje për ndihmë pasi pësoi defekt duke marrë ujë. Pas kësaj, pasagjerët u evakuuan në orët e mëngjesit me koordinimin e Turqisë.
Në anije ndodheshin pasagjerë nga vende të ndryshme si Luksemburgu, Franca, Finlanda, Meksika dhe Malajzia. Për shkak të rrezikut, Gjysmëhëna e Kuqe Turke dhe autoritete të tjera u aktivizuan për të koordinuar evakuimin.
Në një deklaratë nga llogaria zyrtare e Flotës Globale Sumud në rrjetet sociale u theksua se falë koordinimit të shpejtë të qeverisë turke dhe kontributit të Gjysmëhënës së Kuqe Turke në terren, operacioni u zhvillua pa probleme.
FLOTA GLOBALE SUMUD
Flota Globale Sumud, e përbërë nga dhjetëra anije, prej ditësh është nisur drejt Gazës.
Në flotë ndodhen ndihma të shumta humanitare, veçanërisht materiale medicinale.
Kjo është flota më e madhe e organizuar ndonjëherë për të shkuar kolektivisht drejt Gazës.
Fjala “Sumud” në arabisht do të thotë “vendosmëri” ose “qëndresë e pathyeshme”. Pas Luftës së Gjashtë Ditëve në vitin 1967, ajo u shndërrua në një koncept që përshkruan rezistencën dhe qëndrueshmërinë e popullit palestinez përballë presionit.
Koncepti Sumud lidhet me qëndrimin e palestinezëve në tokat e tyre, ruajtjen gjallë të identitetit dhe kulturës palestineze dhe gjetjen e mënyrave për të rezistuar pushtimit përmes mosbindjes civile paqësore dhe ndërtimit të institucioneve alternative.
Në Palestinë, ky koncept shpesh ilustrohet me imazhin e pemës së ullirit dhe të gruas shtatzënë fshatare.
