Një shtetase spanjolle, e cila ndodhej në të njëjtin fluturim me pasagjeren që më vonë vdiq nga hantavirusi, po trajtohet në spital për shkak të dyshimeve për infeksion.
Ministria spanjolle e Shëndetësisë njoftoi të premten gjatë një konference për media se gruaja 32-vjeçare po trajtohet në qytetin e saj të lindjes, Alicante, pasi autoritetet shëndetësore rajonale të Valencias e kontaktuan përmes sistemit evropian të alarmit shëndetësor.
“Gruaja ishte ulur dy rreshta pas personit që vdiq nga hantavirusi, personit që rezultoi pozitiv. Ajo pati vetëm kontakt të shkurtër, pasi ndodheshin për një kohë të shkurtër në avion”, deklaroi sekretari shtetëror për shëndetësi, Javier Padilla, gjatë konferencës për shtyp.
Padilla tha se edhe pasagjerë të tjerë në atë fluturim kishin zhvilluar simptoma të mundshme të virusit, por më vonë kishin rezultuar negativë në testime.
Autoriteti shëndetësor i Anglisë njoftoi gjithashtu se edhe te një britanik në ishullin Tristan da Cunha ekziston dyshimi për këtë sëmundje. Zyrtarët lokalë thanë se ai kishte qenë pasagjer në një anije që kishte ndaluar në ishull nga 13 deri më 15 prill.
Zyrtarët deklaruan se të dy rastet e reja të dyshuara lidhen me klasterin fillestar të infeksionit.
Të enjten, W H O bëri të ditur se deri tani janë konfirmuar pesë raste të virusit dhe tre raste të dyshuara, ndërsa shtete të ndryshme në botë po përpiqen të gjurmojnë dhe monitorojnë pasagjerët që u larguan nga anija Hondius gjatë lundrimit të saj.
