Spanja nuk do të heqë dorë nga respektimi i së drejtës ndërkombëtare, pavarësisht kritikave gjithnjë e më të ashpra nga Shtetet e Bashkuara për refuzimin që të lejojë përdorimin e bazave të saj ajrore për luftën në Iran, deklaroi ministri i Jashtëm spanjoll José Manuel Albares në një intervistë për Politico.
“Ishim një nga vendet e pakta që dërguam ushtri për të ndihmuar Shtetet e Bashkuara të bëheshin komb dhe të fitonin pavarësinë”, kujtoi Albares. Ai shtoi se Madridi dëshiron që marrëdhëniet me Uashingtonin të vazhdojnë të zhvillohen mbi këto baza, por se Spanja në asnjë mënyrë “nuk do t’i shkelë parimet e saj”.
“Ne u përmbahemi vlerave tona dhe mbrojmë interesat e qytetarëve tanë. Kjo është e vetmja gjë që më udhëheq vërtet”, theksoi ministri në intervistën për Politico, të cilën e dha në pallatin Viana, rezidenca zyrtare e diplomacisë spanjolle.
Kërcënime me sanksione dhe përjashtim nga NATO
Këto komente vijnë në një moment tensionesh të rrezikshme mes Madridit dhe Uashingtonit. Spanja ka ndaluar avionët ushtarakë amerikanë të përdorin bazat e saj, pasi kundërshton luftën në Iran. SHBA reagoi ashpër, duke kërcënuar Spanjën me embargo tregtare, tërheqje të trupave dhe madje edhe pezullim nga NATO.
Presidenti Donald Trump në fillim të marsit sulmoi qeverinë spanjolle, duke e quajtur “të tmerrshme” sepse nuk lejoi përdorimin e bazave Morón dhe Rota për nisjen e sulmeve ndaj Iranit. Me atë rast Trump deklaroi: “Nuk duam të kemi asnjë lidhje me Spanjën.”
Albares iu përgjigj menjëherë, duke sqaruar se përdorimi i këtyre bazave buron nga një marrëveshje ndërmjet shteteve, ku thuhet qartë se çdo veprim duhet të jetë në përputhje me të drejtën ndërkombëtare dhe Kartën e Kombeve të Bashkuara.
“Kjo është një luftë e njëanshme për të cilën askush nuk na njoftoi”
“Kjo është një luftë e njëanshme”, vazhdoi Albares. Ai theksoi se asnjë aleat i NATO-s nuk është konsultuar apo informuar për planet amerikane.
“Nuk dimë çfarë po ndodh. Nuk e di as Spanja, as ndonjë vend tjetër. Kjo është edhe një arsye më shumë që të veprojmë dhe të mbrojmë interesat e qytetarëve tanë”, deklaroi ministri spanjoll për Politico.
Nga ana tjetër, zëdhënësja e Shtëpisë së Bardhë, Anna Kelly, përdori tone të ashpra. Për Politico ajo tha se Trump e ka shprehur qartë zhgënjimin e tij ndaj NATO-s dhe partnerëve të tjerë.
“Evropa përfiton jashtëzakonisht shumë nga dhjetëra mijëra ushtarë amerikanë të stacionuar në territorin e saj, por megjithatë refuzuan kërkesat për përdorimin e bazave në mënyrë që të mbronim interesat amerikane”, tha Kelly. Ajo shtoi se Trump nuk do të lejojë kurrë që SHBA të trajtohet padrejtësisht apo të shfrytëzohet nga “të ashtuquajturit aleatë”.
Përplasja mes socialistëve dhe administratës Trump
Spanja, nën udhëheqjen e kryeministrit socialist Pedro Sánchez, është shndërruar në një lloj të jashtmi brenda Bashkimit Evropian kur bëhet fjalë për politikën ndaj Lindjes së Mesme. Qeveria e Sánchez kërkon vazhdimisht që BE-ja të kritikojë më ashpër Izraelin, ndërsa ka sulmuar fort edhe luftën amerikano-izraelite kundër Iranit.
Albares pretendon se qëndrimet spanjolle po bëhen gradualisht dominante brenda bllokut evropian.
“Është e vërtetë që ne ishim të parët që morëm një qasje të tillë, si për Iranin ashtu edhe për gjithçka që po ndodh në Lindjen e Mesme. Në fillim duket sikur jemi vetëm, por pas disa ditësh edhe të tjerët fillojnë të flasin njësoj, ndërsa pas një muaji e gjithë Evropa përsërit fjalët tona”, tha ministri.
Thirrje për krijimin e një ushtrie evropiane
Albares vlerëson se Bashkimi Evropian ndodhet në një pikë kthese dhe duhet të bëhet më i pavarur, pasi paqëndrueshmëria globale po rritet dhe politika transatlantike po bëhet gjithnjë e më e paparashikueshme.
“Ka ardhur koha për sovranitet dhe pavarësi evropiane. Kjo është një çështje ekzistenciale për ne, por edhe për miliona njerëz në mbarë botën”, theksoi ai për Politico.
Për këtë arsye, shefi i diplomacisë spanjolle bëri thirrje që BE-ja të zhvillojë ushtrinë e saj dhe kapacitete të përbashkëta mbrojtëse. Sipas tij, kjo nuk duhet parë si dobësim i NATO-s.
“Shtetet e Bashkuara po e forcojnë vazhdimisht ushtrinë e tyre dhe askush nuk mendon se kjo e dobëson NATO-n”, përfundoi Albares.
