Në një zonë rurale pranë İzmitit, në provincën turke të Kocaelit, është gjetur një mjet ajror pa pilot, për të cilin sipas vlerësimeve të para besohet se është me origjinë ruse dhe i përket tipit të dronëve zbulues-vëzhgues. Autoritetet turke kanë nisur menjëherë hetimet për incidentin.
Sipas njoftimit të Ministrisë së Brendshme të Turqisë, mjeti ajror pa pilot është gjetur në tokë, pasi ishte rrëzuar për arsye ende të paqarta. Analizat paraprake tregojnë se bëhet fjalë për një dron zbulues-vëzhgues Orlan-10, i cili përdoret gjerësisht në operacionet ushtarake ruse.
Rrëzimi i dronit ka tërhequr vëmendje të veçantë të opinionit publik dhe strukturave të sigurisë, duke pasur parasysh faktin se incidenti ka ndodhur rreth 50 kilometra nga Stambolli, në një shtet anëtar të NATO-s.
Zyrtarët turq, për momentin, nuk kanë dhënë informacion nëse dihet nëse mjeti ajror ndodhej në ndonjë mision operacional, as se si ka hyrë në hapësirën ajrore të Turqisë.
Orlan-10 është një mjet ajror pa pilot rus, i destinuar kryesisht për zbulim, vëzhgim dhe mbledhje të të dhënave të inteligjencës. Ai është një dron relativisht i vogël, me hapje krahësh rreth tre metra, që mund të fluturojë në lartësi deri në disa mijëra metra dhe të qëndrojë në ajër deri në 16 orë, në varësi të konfigurimit.
Droni është i pajisur me kamera me rezolucion të lartë, sensorë termikë dhe sisteme për zbulim elektronik, dhe përdoret shpesh për mbikëqyrjen e terrenit, korrigjimin e zjarrit të artilerisë dhe ndjekjen e lëvizjeve të forcave kundërshtare.
