Shërbimi sekret turk MIT dhe njësitë policore kanë çmontuar një rrjet iranian spiunazhi që vepronte në pesë provinca, duke arrestuar gjashtë persona të dyshuar për mbledhjen e informacioneve ushtarake konfidenciale dhe planifikimin e sulmeve brenda vendit.
Sipas hetuesve, rrjeti drejtohej nga struktura iraniane e inteligjencës përmes operativëve të identifikuar si Najaf Rostami, i njohur me nofkën “Haji”, dhe Mahdi Yekeh Dehghan, i cili ishte shënuar si “Doktor”.
Autoritetet pretendojnë se Rostami kishte ngarkuar Alican Koçin, banor i provincës Van në lindje të Turqisë, që të rekrutonte persona për të realizuar fshehurazi fotografi dhe video në zonën përreth bazës ajrore Incirlik në Adana.
Hetimi zbuloi gjithashtu se shtetasi iranian Ashkan Jalali, me bazë në Ankara, kishte planifikuar transferimin e dronëve të armatosur nga Turqia drejt Republikës Turke të Qipros Veriore (TRNC) dhe administratës greke të Qipros, përmes kompanive në pronësi të tij, Bulaq Robotics dhe Arete Industries.
Jalali dhe Koç dyshohet se kanë marrë pjesë në trajnime të specializuara për dronë në Iran gjatë muajve gusht dhe shtator 2025.
Gjatë bastisjeve të koordinuara nga Stambolli, policia arrestoi pronarët e kompanive të mbrojtjes Erhan Ergelen dhe Taner Özcan, sipërmarrësin e tekstilit Cemal Beyaz, Remzi Beyaz, si dhe Koçin dhe Jalalin.
Të gjashtë u paraburgosën më pas nga një gjykatë në Stamboll nën akuzën për “marrje të informatave shtetërore konfidenciale për qëllime spiunazhi politik ose ushtarak”. Sipas hetimeve, Ergelen dhe Özcan kishin udhëtuar në Iran në tetor 2025 dhe kishin role në planet për dërgimin e dronëve drejt pjesës greke të Qipros.
Në dëshminë e tij, Remzi Beyaz deklaroi se i ishte ofruar para për të marrë pjesë në plane atentatesh të drejtuara kundër disidentëve iranianë.
Operacioni zbuloi gjithashtu se rrjeti përdorte komunikim të koduar me emrin “Güvercin” dhe financonte aktivitetet e veta duke i maskuar si tregti komerciale dronësh.
Sipas burimeve turke të sigurisë, MIT gjatë vitit 2025 ka zhvilluar qindra operacione brenda dhe jashtë vendit, të fokusuara në grupet e armatosura, qelizat e spiunazhit, financimin e terrorizmit dhe rrjetet e krimit kibernetik.
