Në Bruksel është mbajtur raundi i ri i dialogut ndërmjet Kosovës dhe Serbisë me ftesë të të dërguarit special të BE-së për dialog, Miroslav Lajçak. Temë e dialogut ishte dinari.
Petar Petkoviq, kryenegociator i Serbisë në dialogun me Kosovën, ka thënë pas takimeve të së martës në Bruksel për çështjen e dinarit në Kosovë, se kryeministri i Kosovës “Albin Kurti synon t’i shuajë institucionet që duhet të jenë themel i Asociacionit të komunave me shumicë serbë”.
“Nëse Kurti ndalon transportin e dinarëve dhe pengon funksionimin e Kursimeve Postare, lind pyetja se si do t’i tërheqin njerëzit paratë. Kjo është arsyeja pse ne duhet të gjejmë një zgjidhje që është e qëndrueshme dhe nuk do të kërcënojë mbijetesën e serbëve të Kosovës. Gjithçka që bën Kurti tregon qartë se ai nuk dëshiron të formojë Asociacionin”, tha Petkoviq.
