Të paktën 128 gazetarë u vranë në mbarë botën gjatë vitit 2025, dhe më shumë se gjysma e këtyre vdekjeve u regjistruan në Lindjen e Mesme, sipas të dhënave të publikuara nga Federata Ndërkombëtare e Gazetarëve (IFJ).
Ky numër paraqet një rritje krahasuar me vitin 2024 dhe, sipas federatës, tregon një përkeqësim të shpejtë të krizës së lirisë së medias në nivel global.
“Kjo nuk është thjesht statistikë, kjo është një alarm i kuq global për kolegët tanë”, tha për AFP sekretari i përgjithshëm i IFJ-së, Anthony Bellanger.
Ai theksoi se rritja e numrit të vrasjeve pasqyron një dështim më të gjerë për mbrojtjen e gazetarëve që punojnë në zona lufte dhe në mjedise politikisht të paqëndrueshme.
IFJ shprehu shqetësim të veçantë për situatën në territoret palestineze, ku ka dokumentuar vrasjen e 56 punonjësve të mediave gjatë vitit 2025, në kuadër të asaj që e cilëson si lufta e vazhdueshme e Izraelit në Gaza.
“Nuk kemi parë kurrë diçka të tillë: kaq shumë vdekje në një kohë kaq të shkurtër, në një hapësirë kaq të vogël”, tha Bellanger.
Përveç Gazës, gazetarë janë vrarë edhe në vende si Jemeni, Ukraina, Sudani, Peruja dhe India, gjë që tregon për përmasat globale të kërcënimit me të cilin përballen punonjësit e mediave.
Bellanger kritikoi ashpër atë që e quajti mosndëshkim të përhapur të përgjegjësve për sulmet ndaj gazetarëve.
“Pa drejtësi, u jepet mundësi vrasësve të gazetarëve të vazhdojnë veprimet e tyre”, paralajmëroi ai.
IFJ njoftoi gjithashtu se aktualisht 533 gazetarë janë të burgosur në mbarë botën, një shifër që është më shumë se dyfishuar në pesë vitet e fundit.
Federata theksoi se numri i saj i gazetarëve të vrarë zakonisht është më i lartë krahasuar me organizata të tjera që monitorojnë lirinë e medias, për shkak të metodologjive të ndryshme. Numri total për vitin 2025 përfshin edhe nëntë gazetarë që humbën jetën në aksidente.
Për krahasim, organizata Reporterët pa Kufij raportoi se këtë vit janë vrarë 67 gazetarë gjatë detyrës, ndërsa UNESCO e vlerëson këtë shifër në 93.
