Presidenti ukrainas kishte pretenduar se “Më në fund kemi marrë informacionin se Kina po furnizon me armë Federatën Ruse”
Kina hodhi poshtë pretendimet e presidentit ukrainas Volodymyr Zelenskyy se Pekini furnizon me armë Rusinë, duke i quajtur ato “akuza të pabaza”, raportoi media shtetërore kineze, transmeton Anadolu.
Gjatë një konference për media në Kiev të enjten, Zelenskyy tha se “Më në fund kemi marrë informacionin se Kina po furnizon me armë Federatën Ruse”, duke shtuar se informacioni për barutin dhe artilerinë ka ardhur nga agjencitë e inteligjencës, raportoi “Ukrainska Pravda”.
“Kina kundërshton me vendosmëri akuzat e pabaza dhe manipulimet politike”, tha zëdhënësi i Ministrisë së Jashtme kineze Lin Jian, duke vënë në dukje se Kievi “është i vetëdijshëm” se Pekini “nuk ka ofruar kurrë armë vdekjeprurëse për asnjë palë të përfshirë në konflikt dhe kontrollon rreptësisht eksportin e artikujve me përdorim të dyfishtë”, tha media shtetërore “Global Times”.
“Ukraina e di mirë këtë dhe ka deklaruar publikisht se shumica e komponentëve në armët e importuara të Rusisë vijnë nga SHBA-ja dhe vende të tjera perëndimore”, tha Lin.
Presidenti ukrainas kishte pretenduar më tej se “përfaqësuesit e Kinës janë të përfshirë në prodhimin e disa armëve në territorin rus”.
Pretendimi i Zelenskyyt për furnizimin e armëve nga Pekini për Rusinë vjen pasi ai pretendoi në fillim të këtij muaji se të paktën 155 shtetas kinezë po luftonin për ushtrinë ruse në Ukrainë dhe se dy prej tyre u arrestuan në rajonin lindor të Donetskut.
Megjithatë, Pekini i kishte quajtur pretendimet e presidentit ukrainas “të papërgjegjshme”.
