Presidenca e vendit me një komunikatë për media kanë njoftuar se e para e vendit Vjosa Osmani ka pritur në takim ambasadorin amerikan, Jeff Hovenier.
Sipas tyre në këtë takim u fol për disa tema shkruan lajmi.net.
Osmani ambasadorit amerikan i ka treguar për ndalimet e qytetarëve tanë që ka bërë Serbia.
Po ashtu në këtë takim u fol edhe për procesin e anëtarësimit të Kosovës në KiE si dhe mbajtjen e votimit për shkarkimin e kryetarëve në katër komunat në veri të vendit.
Po ashtu sipas presidencës në këtë takim u fol edhe për koordinimin e Kosovës me SHBA’të në prag të mbledhjes së Këshillit të Sigurimit.
Njoftimi i plotë:
Presidentja Osmani priti në takim ambasadorin amerikan, Jeffrey Hovenier
Presidentja e Republikës së Kosovës, Vjosa Osmani, ka pritur sot në takim të rregullt ambasadorin e SHBA-ve, Jeffrey Hovenier.
Me këtë rast, Ambasadori Hovenier e ka përgëzuar Presidenten Osmani për një edicion të suksesshëm të Forumit Ndërkombëtar për Gratë, Paqen dhe Sigurinë, duke vlerësuar përkushtimin e saj dhe të Kosovës për ta avancuar këtë agjendë në vend, si dhe në rrafshin ndërkombëtar.
Në takim u diskutua po ashtu për zhvillimet e fundit në vend, ku Presidentja potencoi shkeljen serioze të të drejtave të njeriut dhe marrëveshjes për lirinë e lëvizjes nga ana e Serbisë, përmes ndalimit të qytetarëve të Republikës së Kosovës në zonat kufitare dhe trajtimit të papranueshëm të tyre, si dhe arrestimet e paligjshme të pjesëtarëve të Policisë së Kosovës.
Në takim gjithashtu u diskutua lidhur me procesin e anëtarësimit të Kosovës në Këshillin e Evropës si dhe për përgatitjet që po bëhen për mbarëvajtjen e procesit të votimit që do të mbahet këtë fundjavë në veri të vendit.
Temë e diskutimit ishin edhe përgatitjet që po bëhen si dhe koordinimi me aleatët në prag të mbledhjes së radhës së Këshillit të Sigurimit të Kombeve të Bashkuara, ku Kosova do të përfaqësohet nga Presidentja Osmani./Lajmi.net
