Mediat shtetërore bëjnë të ditur se sulmi i SDF-së kishte në shënjestër pozicionet e ushtrisë pranë lagjes Sheikh Maqsoud
Një ushtar sirian u vra, ndërsa të tjerë u plagosën në një sulm me dron ndaj pozicioneve të ushtrisë nga grupi terrorist SDF në periferi të Halepit, në Sirinë veriore, transmeton Anadolu.
Agjencia Arabe e Lajmeve Siriane (SANA) njoftoi se sulmi me dron i SDF-së kishte në shënjestër pozicionet e ushtrisë pranë lagjes Sheikh Maksoud të Halepit.
Sulmi erdhi një ditë pasi tre ushtarë u plagosën në një sulm të ngjashëm me dron të SDF-së në periferi të Halepit.
Të dielën, kanali televiziv shtetëror “Alikhbariya” raportoi se në Damask u zhvilluan takime me përfaqësuesit e SDF-së, përfshirë komandantin e saj Mazloum Abdi, për të ndjekur zbatimin e një marrëveshjeje të 10 marsit 2025, duke shtuar se bisedimet nuk prodhuan rezultate konkrete.
Zyrtarët sirianë akuzojnë SDF-në për vonimin e zbatimit të marrëveshjes së nënshkruar nga presidenti sirian, Ahmad al-Sharaa dhe udhëheqësi i grupit.
SDF dominohet nga grupi terrorist YPG, dega siriane e organizatës terroriste PKK.
Më 10 mars, presidenca siriane njoftoi nënshkrimin e një marrëveshjeje për integrimin e SDF-së në institucionet shtetërore, duke riafirmuar unitetin territorial të vendit dhe duke hedhur poshtë çdo përpjekje për ndarje.
Autoritetet siriane thonë se në muajt që kanë kaluar, SDF-ja nuk ka treguar asnjë përpjekje për të përmbushur kushtet e marrëveshjes.
