Në rrjetet sociale po shpërndahet një fotografi thellësisht tronditëse e Mikaeel Mirdoraghit, një djalë iranian dhe nxënës i klasës së tretë. Me buzëqeshje në fytyrë, çantën e rëndë në shpinë dhe një shishe në dorë, Mikaeel i bën me dorë nënës së tij në shkallët e shtëpisë.
Ishte përshëndetja e tij e fundit, para se të vritej në një sulm shkatërrues ajror ndaj shkollës së tij fillore në qytetin iranian Minab.
Fotografia e këtij fëmije të pafajshëm, e publikuar nga agjencitë shtetërore iraniane IRNA dhe Press TV, është kthyer në simbol tragjik të sulmit të tmerrshëm që ndodhi të shtunën në mëngjes, të cilin burimet lokale dhe shërbimet e emergjencës e përshkruajnë si një sulm ajror të qëllimshëm amerikan-izraelit.
Sipas raporteve të detajuara, objektivi i sulmit ishte një kompleks shkollor në jug të Minabit, ku u vranë të paktën 165 nxënës, kryesisht vajza të moshës 7 deri në 12 vjeç.
Të mbijetuarit tregojnë se menjëherë pas sulmit të parë ndodhi edhe një i dytë. Sipas Middle East Eye (MEE), bomba e dytë goditi zonën ku ndodheshin fëmijët e mbijetuar, pikërisht në momentin kur prindërit e tmerruar po vinin për t’i marrë.
Në atë kohë në shkollë ndodheshin rreth 170 vajza, ndërsa raportet e mëparshme sugjerojnë se prindërve u ishte kërkuar të vinin t’i merrnin fëmijët kur filluan sulmet.
“Kur bomba e parë goditi shkollën, mësuesi dhe drejtori zhvendosën një grup nxënëse në sallën e lutjeve për t’i mbrojtur”, tha një nga mjekët e Gjysmëhënës së Kuqe, duke iu referuar dëshmive të të mbijetuarve. Ai shtoi se drejtori kishte telefonuar prindërit që të vinin menjëherë për fëmijët e tyre. “Por bomba e dytë goditi atë zonë. Vetëm një numër shumë i vogël vajzash mbijetoi.”
Rohollah, babai i një vajze që vdiq në sulmin e dytë, përshkroi tmerrin që pa pasi shkolla e kishte kontaktuar.
“Vajza ime i mbijetoi goditjes së parë dhe u dërgua në sallën e lutjeve. Goditja e dytë ndodhi para se të arrija tek ajo. Vajza ime u dogj plotësisht. Nuk mbeti asgjë prej saj; mundëm ta njohim vetëm nga çanta e shkollës që mbante”, tregoi babai i dëshpëruar.
Të mbijetuarit dhe dëshmitarët i përshkruan sulmet si një shembull të taktikës brutale të quajtur “double-tap”, ku objektivi goditet sërish menjëherë pas sulmit të parë. Qëllimi i kësaj taktike është të shkaktojë dëme shtesë ndaj ekipeve mjekësore dhe civilëve që vijnë për ndihmë. Praktika të ngjashme janë dokumentuar edhe në Gaza dhe konflikte të tjera, dhe ekspertët e së drejtës ndërkombëtare e konsiderojnë atë krim lufte.
Video që qarkullojnë në rrjete tregojnë qytetarë që përpiqen me duar të zbuluara të shpëtojnë të mbijetuarit, ndërsa avionët kthehen dhe bombardojnë përsëri të njëjtin vend.
“Po përpiqeshim të nxirrnim njerëzit nga rrënojat kur avioni u kthye dhe goditi të njëjtin vend edhe katër herë të tjera. Do të kishim vdekur nëse nuk do të kishim qenë nën rrënoja”, tha një dëshmitar.
Megjithëse imazhet satelitore tregojnë se edhe ndërtesa të Gardës Revolucionare Iraniane (IRGC), rreth 200 metra larg, janë goditur, mjekët janë të bindur se sulmet kanë goditur drejtpërdrejt shkollën dhe kanë vrarë fëmijë, pasi ndërtesat ushtarake kanë pësuar dëme shumë më të vogla.
Varrimi masiv u mbajt të martën. Sipas autoriteteve lokale, 69 viktima ende nuk janë identifikuar, pasi trupat ishin djegur ose deformuar deri në atë masë sa nuk mund të njiheshin. Prindërit i identifikonin fëmijët vetëm nga mbetjet e çantave të shkollës ose nga byzylykët e artë.
Organizata Human Rights Activists raporton se që nga fillimi i fushatës amerikano-izraelite në Iran janë vrarë të paktën 1.097 civilë. Janë goditur spitale, shtëpi dhe biznese, krahas sulmeve ndaj infrastrukturës së zyrtarëve dhe objekteve bërthamore.
Një panel ekspertësh i OKB-së e quajti sulmin ndaj shkollës “thellësisht shqetësues” dhe kërkoi një hetim urgjent. Ambasadori iranian në OKB, Ali Bahreini, e cilësoi sulmin të pajustifikuar dhe kriminal. Ndërkohë, zyrtarë amerikanë dhe izraelitë thanë se po hetojnë incidentin, ndërsa Sekretari amerikan i Shtetit Marco Rubio deklaroi se forcat amerikane “nuk do të synonin qëllimisht një shkollë”.
