Forcat ukrainase të sistemeve pa pilot vranë të shtunën një gjeneral rus në lindje të Ukrainës, pak më shumë se dy javë pasi ai ishte dekoruar me titullin “Hero i Rusisë” për shërbimin e tij në luftë. Lajmin e bëri të ditur komandanti ukrainas i dronëve, Robert Brovdi.
Gjeneralmajori Anton Grunis kishte marrë më herët gjatë këtij viti vlerësime nga presidenti rus Vladimir Putin, pasi raportoi se ushtarët nën komandën e tij e kishin ndihmuar Rusinë të merrte nën kontroll bastionin ukrainas të Kostyantynivkës. Kievi dhe analistët e pavarur ushtarakë i kundërshtojnë këto pretendime.
Brovdi, i cili komandon Forcat ukrainase të Sistemeve pa Pilot, deklaroi se njëra prej njësive të tij e vrau Grunisin gjatë një sulmi nate ndaj pozicionit të tij në pjesën e rajonit të Donetskut që kontrollohet nga Rusia.
“Gjenerali Grunis u eliminua më 12 shtator”, shkroi Brovdi të mërkurën në Telegram. Ai shtoi se Grunis ishte komandanti i shtatë ushtarak rus që ishte vrarë nga forcat e tij të dronëve. Reuters nuk ka mundur t’i verifikojë në mënyrë të pavarur pretendimet e Brovdit.
Ministria ruse e Mbrojtjes nuk i konfirmon rregullisht vdekjet e zyrtarëve të lartë ushtarakë në front. Megjithatë, komandanti rus Apti Alaudinov deklaroi në Telegram se Grunis kishte humbur jetën, pa dhënë hollësi të tjera.
Në fund të gushtit, gjatë një ceremonie dekorimi, Grunis kishte marrë Yllin e Artë të Heroit të Rusisë. Me një shprehje serioze në fytyrë, ai qëndronte në krye të rreshtit të oficerëve të veshur me uniforma ceremoniale.
Më 3 korrik, Grunis iu drejtua Putinit përmes një videolidhjeje, gjatë një takimi të transmetuar në televizion për çështjet e sigurisë. Ai përshkroi me hollësi se si pjesëtarët e Brigadës së Katërt të Veçantë të Motorizuar të Gardës, të komanduar prej tij, kishin marrë pjesë në pushtimin e pretenduar të Kostyantynivkës.
Putini e uroi dhe i tha: “Fati i buzëqesh atij që punon”.
Ukraina e mohoi në atë kohë se Rusia e kishte pushtuar qytetin, duke deklaruar se forcat e saj vazhdonin ta mbanin atë nën kontroll. Instituti amerikan për Studimin e Luftës (ISW) raportoi se forcat ruse kishin depërtuar në qytet, por nuk e kishin marrë plotësisht nën kontroll. Sipas ISW-së, pretendimi rus ishte pjesë e një fushate më të gjerë informative, që synonte “t’i paraqiste vijat ukrainase të frontit sikur po shembeshin”.
Përparimi i përgjithshëm rus është ngadalësuar gjatë këtij viti, por forcat e Moskës vazhdojnë presionin ndaj qyteteve me rëndësi strategjike, si Kostyantynivka. Rusia synon të marrë kontrollin e të gjithë rajonit të gjerë të Donbasit. Kjo kërkesë përbën një nga çështjet kryesore territoriale në bisedimet me Kievin, të cilat aktualisht kanë ngecur.
