Federata Ruse nuk do të jetë në gjendje të pushtojë Donbasin para fundit të vitit 2026, ka deklaruar një përfaqësues i lartë i NATO-s, sipas gazetës ruse të mërgimit The Moscow Times. Sipas tij, Rusia thjesht nuk ka kapacitet që ta arrijë këtë më herët.
“Pushtimi i pjesës së mbetur të rajonit të Donjeckut për rusët nuk është opsion realist të paktën edhe për një vit tjetër”, citon gazeta përfaqësuesin e Aleancës.
Ky vlerësim bazohet në ritmin aktual të përparimit të ushtrisë pushtuese ruse, e cila në drejtim të Pokrovskut lëviz mesatarisht vetëm 120 metra në ditë.
Pavarësisht presionit financiar në rritje, Aleanca vlerëson se Rusia mund të vazhdojë luftën me intensitetin aktual deri në vitin 2027. Ushtria ruse pëson humbje të mëdha në fushëbetejë; sipas vlerësimeve të NATO-s, forcat ukrainase çdo ditë neutralizojnë rreth 1.100 ushtarë rusë.
Në total, Moska ka humbur rreth 1.15 milionë ushtarë. Këto shifra përfshijnë të vrarët dhe të plagosurit.
Edhe pse humbjet janë enorme, presidenti rus Vladimir Putin ende ngul këmbë për vazhdimin e luftimeve dhe nuk tregon interes për paqe.
“Nuk shoh asnjë shenjë se Putini ka interes serioz për një marrëveshje paqeje ose se është i gatshëm për lëshime që mund të çojnë drejt paqes”, tha përfaqësuesi i NATO-s.
Kjo përputhet me mesazhet që vijnë nga Moska. Zyrtarët rusë vazhdojnë të deklarojnë se marrëveshja e paqes nuk është e mundur derisa të realizohen objektivat kryesore të luftës:
– pushtimi i të gjitha territoreve të aneksuara në mënyrë të paligjshme, të cilat Rusia as nuk i kontrollon plotësisht,
– detyrimi i SHBA-së dhe Evropës t’i njohin juridikisht këto territore si “pronë” të Moskës,
– dhe kufizimi i ushtrisë ukrainase.
Sipas NBC-së, për këto tre çështje nuk ekziston asnjë konsensus, ndërkohë që Moska thotë se nuk do të tërhiqet nga asnjë prej tyre.
