Miss Finlandës Sarah Dzafce, e cila është me origjinë nga Kosova, do t’i hiqet titulli pasi në rrjetet sociale filloi të qarkullojë një fotografi për të cilën ajo u akuzua për racizëm.
Në fotografi, ajo shihet duke tërhequr sytë, ndërsa në përshkrim, në gjuhën finlandeze, shkruhet “kiinalaisenkaa syömäs”, që përafërsisht mund të përkthehet si “duke ngrënë me një kinez”.
Shumë persona e interpretuan këtë si tallje ndaj aziatikëve. Ajo deklaroi se kishte tërhequr sytë për shkak se kishte një dhimbje të fortë koke.
Sarah Dzafce, për shkak të kësaj fotografie, u gjend në qendër të një skandali (Foto: Instagram).
Nga organizata e zgjedhjes së Miss Finlandës u njoftua se ata nuk pranojnë racizmin apo diskriminimin në asnjë formë. Ata gjithashtu kërkuan ndjesë për këtë “incident” dhe shtuan se do t’ia heqin titullin.
Si pasojë e këtij vendimi, Tara Lehtonen, e cila në shtator ishte renditur e dyta, do të jetë Miss Finlanda e re. Ndërkohë, Sarah Dzafce organizoi një konferencë për media, ku, ndër të tjera, kërkoi falje.
“Jam shumë e penduar për të gjithë ata që i kam fyer dhe lënduar me veprimet e mia në rrjetet sociale”, deklaroi ajo.
