Mediat izraelite raportuan se administrata e Tel Avivit është e shqetësuar nga ngritja e Turqisë, duke pretenduar se “Turqia po ndërton një Perandori të Atdheut Blu nga Greqia deri në Jemen”.
Në analizën e publikuar në televizionin izraelit Kanal 13, u theksua se “ngritja dominuese e Turqisë, e cila po intensifikon aktivitetet e saj në qendrat e fuqisë në rajon, përbën një sfidë të paprecedentë për Izraelin”.
Në analizë pretendohet se Turqia “po shton aktivitetet e saj në qendrat e fuqisë rajonale dhe po mbush me hapa gjigantë boshllëkun gjeopolitik në rajon”.
Sipas analizës, me doktrinën “Atdheu Blu”, Turqia do të kontrollojë pikat kyçe të kalimeve detare ndërmjet Detit të Zi dhe Mesdheut, ndërsa duke arritur te rezervat e gazit dhe naftës në Mesdheun Lindor do të sigurojë pavarësinë energjetike. Në analizë u përdorën edhe shprehjet: “Turqia nuk po mjaftohet më vetëm me vizatimin e hartave. Ajo po i zbaton këto përmes fuqisë dhe diplomacisë agresive.”
Analiza thekson gjithashtu se “Turqia ka kontroll në Siri dhe Libi”, gjë që sipas saj mundëson krijimin e një “ure detare” nga Mesdheu drejt Evropës. Po ashtu, thuhet se “në Somali ajo ka ndikim mbi Ngushticën Bab el-Mandeb dhe ka ngritur aty një bazë me kapacitet për lëshim satelitësh”.
Mediumi izraelit vuri në dukje se Turqia është një aleat i pazëvendësueshëm për SHBA-në dhe Evropën, duke deklaruar se: “Falë pozitës së saj unike gjeografike, Turqia ka një rëndësi të pazëvendësueshme si pikë strategjike mbështetëse për NATO-n dhe SHBA-në.” U pretendua gjithashtu se roli i saj si urë lidhëse ndërmjet tri kontinenteve, kontrolli i kalimeve kritike si ngushticat, funksioni si zonë tampon me Lindjen e Mesme dhe bashkëpunimi ushtarak me SHBA-në e bëjnë Turqinë një aktor jetik.
Izraeli po përpiqet ta ndalë Turqinë
Në analizë thuhet se Izraeli po përpiqet ta ndalë Turqinë përmes sulmeve në Siri, aleancës së krijuar me Greqinë dhe Administratën Greke të Qipros Jugore (GKRY), si dhe përmes hapave si njohja e Somalilandit si shtet.
Duke përdorur shprehjen “ngritja e Turqisë si një fuqi dominuese përbën një sfidë komplekse dhe të paprecedentë për Izraelin”, mediumi izraelit tërhoqi vëmendjen se Ankaraja, ndryshe nga Teherani, është anëtare e NATO-s dhe aleate e SHBA-së.
Gjithashtu u theksua se kjo situatë kufizon lirinë e veprimit të ushtrisë izraelite në Gaza dhe Siri dhe përbën një kërcënim të drejtpërdrejtë për interesat e Izraelit.
