Sipas planit, urat po pajisen me “struktura inxhinierike për bashkimin e materialeve shpërthyese”
Punimet e ndërtimit në urat pranë kufirit të Lituanisë me Bjellorusinë janë pjesë e masave të planifikuara të fortifikimit ushtarak, kanë konfirmuar Forcat e Armatosura Lituaneze, transmeton Anadolu.
Ushtria i tha sot transmetuesit publik LRT se puna është e lidhur me përgatitjet për vijën mbrojtëse të Baltikut përgjatë kufijve të Lituanisë me Rusinë dhe Bjellorusinë, aleatin më të ngushtë të Moskës në luftën e Ukrainës.
Sipas planit, urat po pajisen me “struktura inxhinierike për bashkimin e materialeve shpërthyese”.
“Urat dhe rrugët zgjidhen bazuar në vendndodhjen e pengesave natyrore dhe rëndësinë e tyre strategjike në sistemin mbrojtës të Lituanisë”, thanë forcat e armatosura.
Sipas ushtrisë, dhjetëra vende pranë kufirit janë krijuar tashmë për të ruajtur pengesa antitank dhe pengesa të tjera mbrojtëse. Po punohet gjithashtu për të mbjellë pemë përgjatë rrugëve kryesore për mbrojtje dhe për të thelluar kanalet e ujitjes, të cilat do të shërbenin si llogore dhe barriera shtesë antitank.
Në rast të një konflikti të armatosur, urat pranë kufirit mund të shemben më lehtë, duke ndihmuar në bllokimin e lëvizjes së forcave ushtarake.
Përgatitje të ngjashme kanë qenë prej kohësh pjesë e strategjisë mbrojtëse të Finlandës, e cila ka kufirin më të gjatë të çdo vendi të NATO-s me Rusinë. Vitin e kaluar, Finlanda u kërkoi vendeve evropiane të përqendroheshin në përgatitje dhe jo në retorikë.
Në fillim të Luftës së Dytë Botërore, Bashkimi Sovjetik pushtoi Finlandën dhe e mundi atë brenda disa muajsh.
