Kryeministri i Norvegjisë shprehu keqardhje për reagimin disproporcional të Izraelit ndaj një sulmi vdekjeprurës të Hamasit dhe dënoi situatën “katastrofike” humanitare në Rripin e Gazës, duke shtuar se vendi i tij është një “mik i Izraelit” që ka të drejtë të mbrohet në përputhje me ligjin humanitar. .
“E drejta ndërkombëtare dikton që reagimi duhet të jetë proporcional. Civilët duhet të merren parasysh dhe ligji humanitar është shumë i qartë në këtë drejtim. Besoj se ky nivel është tejkaluar shumë”, tha Jonas Gahr Store për radion publike PRC, shkruan AFP.
Ai theksoi se rreth gjysma e të vdekurve ishin fëmijë.
“Izraeli ka të drejtë të mbrohet dhe e pranoj se është e vështirë të mbrohet nga sulmet që vijnë nga një zonë kaq e dendur e populluar si Gaza. Raketat ende gjuhen nga Gaza dhe ne e dënojmë atë”, tha kreu i qeverisë norvegjeze.
Ndryshe nga fqinjët nordikë që abstenuan gjatë votimit të së premtes mbi rezolutën jodetyruese të OKB-së mbi kërkesën për një armëpushim të menjëhershëm, të përhershëm dhe të qëndrueshëm humanitar për t’i dhënë fund armiqësive, Norvegjia e mbështeti rezolutën.
Store tha se Norvegjia është “mik i Izraelit” dhe se “dënon sulmet e Hamasit tre javë më parë” dhe kërkon që “pengët të lirohen menjëherë”, por se ai duhet të jetë i qartë për situatën në Gaza.
“Situata është katastrofike dhe mendoj se është një shkelje e hapur e asaj që ne e quajmë rregulla të luftës apo ligjit humanitar”, tha kryeministri.
