Sipas Ligjit të miratuar për Autorizimin e Mbrojtjes Kombëtare për vitin 2026, Kongresi i SHBA-së ka votuar që Shtetet e Bashkuara nuk mund t’i ulin trupat e tyre në Evropë nën 76.000 ushtarë pa paraqitur më parë një vlerësim të detajuar dhe një konfirmim për Kongresin se një veprim i tillë nuk do të dëmtonte interesat e sigurisë së SHBA-së ose NATO-s.
Projektligji gjithashtu kufizon uljen e numrit të ushtarëve në Korenë e Jugut nën 28.500, duke kërkuar që çdo reduktim të shoqërohet me dëshmi nga Pentagoni se parandalimi ndaj Koresë së Veriut nuk do të dobësohet, se aleatët janë konsultuar dhe të jepet një arsyetim i qartë për sigurinë kombëtare dhe një vlerësim i ndikimit rajonal.
Ligji detyron gjithashtu SHBA-në të mbajë pozitën e Komandantit Suprem të Forcave Aleate në Evropë (SACEUR), pozita më e lartë ushtarake brenda NATO-s që tradicionalisht mbahet nga një gjeneral amerikan.
Këto kufizime pasojnë raportet se Pentagoni po shqyrtonte mundësinë e uljes së forcave në Evropë dhe Korenë e Jugut, madje edhe heqjen dorë nga pozita e SACEUR-it.
Gjatë takimit të javës së kaluar mes zyrtarëve amerikanë të sigurisë kombëtare dhe liderëve evropianë, zyrtarët e SHBA-së u thanë homologëve të tyre se Evropa duhet të përgatitet të mbajë pjesën më të madhe të barrës së mbrojtjes së NATO-s deri në vitin 2027, raportojnë për Fox News Digital tre zyrtarë evropianë të njohur me diskutimet.
SHBA planifikon të mbajë postin e SACEUR-it, por synon t’u ofrojë disa pozita të tjera të larta ushtarake brenda NATO-s vendeve evropiane. Po ashtu, Washingtoni theksoi se nuk ka plane afatshkurtra për ulje të mëdha të trupave në Evropë.
“Ne kemi qenë shumë të qartë mbi nevojën që evropianët të udhëheqin mbrojtjen konvencionale të Evropës. Ne mbetemi të përkushtuar përmes mekanizmave koordinues të NATO-s për forcimin e aleancës dhe sigurinë e saj afatgjatë, ndërsa aleatët evropianë marrin gjithnjë e më shumë përgjegjësi,” tha zëdhënësi i Pentagonit, Kingsley Wilson.
Më herët këtë vit, ushtria amerikane uli praninë e një brigade rotuese të vendosur kryesisht në Rumani, duke bërë që aleatët evropianë të pyesin nëse ky hap mund të jetë sinjali i një tërheqjeje më të gjerë të forcave amerikane nga krahina lindore e NATO-s.
