Reagimi me humor i një dyqani veshjesh në Kopenhagë ndaj kapelave të kuqe bejsbolli të presidentit amerikan Donald Trump është shndërruar në një simbol të papritur të solidaritetit danez me Grenlandën, ndërsa po rriten protestat për shkak të kërkesave amerikane për ta blerë këtë territor.
Kapelat e kuqe i ngjajnë kapelave “Make America Great Again” që i mbajnë mbështetësit e Trumpit, por mbi to shkruhen slogane si “Make America Go Away” dhe “Already Great” (“Largojeni Amerikën” dhe “Ne jemi tashmë të mëdhenj”, ang.).
Bashkëpronari i dyqanit, Michael, tha se kapelat kishin qëndruar për muaj të tërë pa u shitur, përpara se të bëheshin papritur shumë të kërkuara.
“Në fillim bëmë vetëm njëqind copë. Kur u bë virale, u bë jashtëzakonisht popullore”, tha Michael.
Pronari kryesor, Jesper Rabe Tønnesen, e shpiku një nga sloganet e vendosura në kapela, “Nu det NUUK” – një lojë fjalësh në danisht që tingëllon si “Nu det nok”, që do të thotë “Tani mjaft”, por ku fjala “nok” zëvendësohet me “Nuuk”, kryeqytetin e Grenlandës.
“Mendova: ‘Si mund ta përcjellësh një mesazh në mënyrë të thjeshtë, duke e tërhequr një vijë të qartë?’”, tha Tønnesen për Reuters, duke shtuar se të shtunën, në protestën e mbajtur në Kopenhagë, ai ndau 300 kapela, duke i transportuar me biçikletë transporti.
Dhjetëra mijëra njerëz u mblodhën gjatë fundjavës në Kopenhagë dhe në Nuuk, duke brohoritur “Grenlanda nuk është në shitje” dhe duke marshuar drejt përfaqësive diplomatike amerikane, ndërsa shumë prej tyre mbanin kapela proteste.
Trump pretendon se Grenlanda është e një rëndësie kyçe për sigurinë e SHBA-së, për shkak të pozitës së saj strategjike dhe pasurive minerare, dhe nuk e ka përjashtuar përdorimin e forcës për të marrë kontrollin mbi ishullin. Kërcënimet e tij kanë shkaktuar një krizë diplomatike mes aleatëve në NATO.
“Njerëzit kanë nevojë të dalin dhe të dërgojnë një mesazh. Thjesht na mjaftoi—jemi të lodhur, të trishtuar dhe të rraskapitur”, tha Tønnesen.
