Transmetuesi publik izraelit Kan News publikoi pretendime se në territorin e Turqisë po trajnohen operativë të Hamasit për përdorimin e armëve të zjarrit, gjë që konsiderohet si një tjetër tregues se Tel Avivi e sheh Ankaranë si një rival serioz.
Izraelitët pretendojnë se operativët, të cilët mbajnë veshje civile, marrin pjesë rregullisht në trajnime për përdorimin e armëve të lehta dhe taktikave në klube publike të qitjes, si dhe në trajnime për përdorimin e dronëve. Sipas raportit, ata madje kanë marrë edhe leje zyrtare për përdorimin e dronëve në Turqi.
Qëllimi i pretenduar është përfundimi i trajnimit të tyre para se të transferohen në Liban, Jordani dhe Bregun Perëndimor, ku do të kryenin sulme në konfliktet e ardhshme me Izraelin.
Dhjetorin e kaluar, Izraeli pretendoi se kishte zbuluar një rrjet për “pastrim parash” nën mbështetjen e Iranit, i cili menaxhohej nga Hamasi në Turqi.
Sipas deklaratës së IDF-së, dokumentet e organizatës tregonin se Hamasi menaxhonte një rrjet këmbimi parash që përfshinte banorë të Gazës të vendosur në Turqi, duke përdorur institucionet financiare të këtij shteti.
Në nëntor të vitit të kaluar, ministri izraelit për diasporën, Amichai Chikli, e quajti Turqinë kërcënimin më serioz për Izraelin dhe deklaroi se e sheh Turqinë e Recep Tayyip Erdoğan si “Iranin e ri”. Në shkurt të këtij viti, ish-kryeministri izraelit dhe aktualisht lider i opozitës, Naftali Bennett, deklaroi se Turqia paraqet kërcënim sigurie për Izraelin.
