Qeveria e Izraelit, pas inaugurimit të presidentit të ri të SHBA-së, Donald Trump, ka të ngjarë të kufizojë ardhjen e ndihmës humanitare në Gazë, shkruan CNN duke cituar një zyrtar të kësaj qeverie.
Sipas raportit, kjo është një nga opsionet e mundshme që po shqyrtohen në Tel Aviv.
Arsyeja për këtë veprim, sipas zyrtarëve izraelitë, është se “ndihma nuk shkon në duart e duhura,” duke nënkuptuar që përfundon te grupi palestinez Hamas, me të cilin Izraeli është në konflikt që nga 7 tetori 2023, dhe jo te civilët në këtë territor palestinez.
Organizatat humanitare vazhdimisht bëjnë thirrje për rritjen e sasisë së ndihmës humanitare të lejuar të hyjë në zonën e rrethuar, duke paralajmëruar për muaj të tërë për rrezikun në rritje të urisë për civilët.
Zyra e Kombeve të Bashkuara për Koordinimin e Çështjeve Humanitare (OCHA) deklaroi të martën se në dhjetor vetëm 2,205 kamionë me ndihmë hynë në Gazë, duke përjashtuar automjetet tregtare dhe karburantet.
Izraeli e ka kundërshtuar këtë shifër, duke pohuar se nuk ka kufizim në sasinë e ndihmës që mund të hyjë në Gazë dhe se gjatë muajit hynë më shumë se 5,000 kamionë, sipas deklaratës së Koordinimit të Aktivitetit të Qeverisë në Territoret (COGAT), që menaxhon rrjedhën e ndihmës në zonë.
Zyrtarët e OKB-së thonë se numri i kamionëve që hynin në Gazë para luftës ishte rreth 500 në ditë, ose 15,000 në muaj.
Vlerësohet se 91% e 2.1 milionë banorëve të territorit përballen me nivele të larta të pasigurisë ushqimore akute, sipas OCHA-s.
Në tetor, më pak se një muaj para zgjedhjeve presidenciale amerikane, administrata e presidentit Joe Biden i dërgoi një letër qeverisë izraelite duke kërkuar që të ndërmerren masa për përmirësimin e situatës humanitare në Gazë brenda 30 ditëve, ose të rrezikohet shkelja e ligjeve amerikane që rregullojnë ndihmën ushtarake të huaj, duke sugjeruar se ndihma ushtarake amerikane mund të vihej “në rrezik.”
Lista e kërkesave përfshinte lejimin e hyrjes së të paktën 350 kamionëve në ditë në Gazë, së bashku me zbatimin e pauzave në aksionet luftarake për të përmirësuar rrjedhën dhe sigurinë për konvojet humanitare dhe lëvizjet.
Shtatë ditë pasi Trump fitoi zgjedhjet dhe kur afati përfundoi, administrata e Biden-it vlerësoi se Izraeli nuk po bllokonte ndihmën, pavarësisht faktit se kërkesat kryesore nga letra nuk ishin përmbushur.
