Izraeli ka nisur një fushatë për ndryshimin e imazhit në mesazhet që japin programet biseduese të inteligjencës artificiale, si Gemini dhe ChatGPT, ndërsa ajo do të udhëhiqet nga Brad Parscale.
Parscale ka drejtuar më parë operacione në fushën digjitale për Izraelin, ndërsa publiku në Bosnje dhe Hercegovinë e njeh edhe si personin që, së bashku me Donald Trump Jr., ka qenë në Banja Llukë më herët këtë muaj.
Si ish-bashkëpunëtor i presidentit të Shteteve të Bashkuara të Amerikës, Donald Trump, Parscale ka zhvilluar një marrëdhënie pune me Trump Jr. dhe shpesh e shoqëron në udhëtime të tilla.
Përveç këtij bashkëpunimi, Parscale shpesh punon edhe për qeverinë në Tel Aviv, ku bën pjesë edhe ky projekt.
Konkretisht, përmes kompanisë Market Brew, në të cilën investon, Parscale do të publikojë përmbajtje në internet që e paraqet Izraelin në dritë pozitive, me qëllim që të ndikojë programet biseduese të mos përhapin perspektivë negative për këtë vend.
Ekipi ka krijuar nëntë faqe interneti, përmbajtja e të cilave është dizajnuar në mënyrë që t’i përgjigjet mënyrës se si platformat e inteligjencës artificiale funksionojnë, duke simuluar përmbajtjen që ato kanë më shumë gjasa ta shfaqin.
Ndër këto faqe janë paxpoint.org, që thekson përkushtimin e vazhdueshëm të Izraelit për paqe dhe bashkëjetesë, si dhe factsignal.org, që tregon se cilësimi i Hamasit si organizatë terroriste pasqyron një konsensus global, shkruan faqja e lajmeve Axios.
Strategët digjitalë kanë krijuar më pas një platformë të rreme të inteligjencës artificiale dhe kanë testuar nëse ajo merr përmbajtje nga këto faqe.
Ata kanë zbuluar se informacionet që këto programe kanë më shumë gjasa të marrin vijnë nga burime të besueshme, janë të shkruara me ton faktik dhe janë të strukturuara qartë.
Ekipi i Parscale thotë se tashmë po sheh rezultate, ku sistemet e njohura të inteligjencës artificiale po përfshijnë informacion nga këto faqe në përgjigjet e tyre, megjithëse kanë refuzuar të publikojnë të dhëna konkrete.
