Në ditën kur presidenti amerikan Donald Trump dhe kryeministri izraelit Benjamin Netanyahu zhvillojnë takim, në Iran u shënua 47-vjetori i Revolucionit Islamik që çoi në krijimin e Republikës Islamike.
Revolucioni rrëzoi monarkinë e dinastisë Pahlavi dhe vendosi Republikën Islamike të Iranit, me ajatollahun Ruhollah Khomeini si udhëheqësin e parë suprem.
Aktualisht, posti i udhëheqësit suprem mbahet nga ajatollah Ali Khamenei, në duart e të cilit është përqendruar pushteti më i madh në vend.
Në sheshin qendror të Teheranit, disa pjesëmarrës mbanin kukulla gjigante me figurat e Trump dhe Netanyahut, ndërsa të tjerë postera ku ata paraqiteshin me “duar të përgjakura” ose të vizatuar si djaj.
Përvjetori i Republikës Islamike u mbajt pas protestave të fundit masive kundër qeverisë, të nxitura nga kriza e thellë ekonomike.
Sipas organizatave joqeveritare që monitorojnë situatën në Iran dhe Lindjen e Mesme, gjatë shtypjes së protestave janë vrarë të paktën 2.000 persona dhe janë arrestuar dhjetëra mijëra të tjerë.
Festimet u zhvilluan në një klimë tensionesh të larta dhe në kohën e rritjes së pranisë ushtarake amerikane në Lindjen e Mesme.
Trump ka kërcënuar në disa raste regjimin në Teheran me mundësinë e një sulmi ushtarak.
