Një zyrtar egjiptian i inteligjencës tha se Egjipti i dërgoi disa herë paralajmërime Izraelit për situatën në Gaza, por qeveria izraelite me këmbëngulje e injoroi informacionin.
Egjipti, i cili shpesh vepron si ndërmjetës midis Hamasit dhe Izraelit, ka bërë disa përpjekje për të kontaktuar zyrtarët izraelitë për të diskutuar “diçka të madhe” që po ndodh në Rripin e Gazës.
Megjithatë, sipas një zyrtari të inteligjencës egjiptiane, zyrtarët izraelitë ishin të fokusuar në Bregun Perëndimor dhe minimizuan kërcënimet nga Gaza.
“Ne i paralajmëruam se situata do të “shpërthejë” shumë shpejt. Ne paralajmëruam se do të ishte e madhe. Megjithatë ata i nënvlerësuan paralajmërimet e tilla”, tha zyrtari.
Meqë ra fjala, luftimet në Gaza, por edhe jashtë kësaj zone, po vazhdojnë prej më shumë se dy ditësh dhe anëtarët e Hamasit kanë konfirmuar se kontrollojnë gjashtë lokacione jashtë zonës së Gazës, të cilat ndodhen thellë në territorin e Izraelit. .
Luftimet po zhvillohen në Be’eri, Kfar Aza, Nirim dhe Alumim. Disa nga militantët e Hamasit kanë qenë në Izrael që nga sulmi i parë të shtunën, ndërsa të tjerë kaluan kufirin në dy ditët e fundit.
