Presidenti i Shteteve të Bashkuara, Donald Trump, ka njoftuar se ka nënshkruar ligjin që detyron publikimin e plotë të të gjitha dosjeve të lidhura me të dënuarin për krime seksuale Jeffrey Epstein.
Sipas ligjit, Departamenti i Drejtësisë i SHBA-së duhet të publikojë të gjitha informacionet nga hetimet mbi Epsteinin “në format të kërkueshëm dhe të shkarkueshëm” brenda 30 ditëve.
Trump më herët kundërshtonte publikimin e dokumenteve, por javën e kaluar ndryshoi qëndrim pasi u përball me presion nga viktimat e Epsteinit dhe nga vetë anëtarët e Partisë Republikane.
Ligji u miratua me shumicë dërrmuese në të dy dhomat e Kongresit – Dhomën e Përfaqësuesve dhe Senatin.
Në një postim në Truth Social, Trump akuzoi demokratët se po e përdorin çështjen për të larguar vëmendjen nga “arritjet e administratës së tij”.
“E vërteta për këta demokratë dhe lidhjet e tyre me Jeffrey Epsteinin mund të dalë shumë shpejt në dritë, pasi sapo nënshkrova Ligjin për publikimin e dosjeve të Epsteinit,” shkroi ai.
Presioni ndaj Trump dhe kthesa e tij politike
Akt i transparencës – Epstein Files Transparency Act synon të detyrojë Departamentin e Drejtësisë të publikojë të gjitha materialet jo të klasifikuara të lidhura me Epsteinin, përfshirë:
-
dokumente hetimore,
-
komunikime të brendshme,
-
deklarata të viktimave dhe dëshmitarëve,
-
materiale të sekuestruara gjatë kontrolleve në pronat e tij,
-
ditarë fluturimesh,
-
emra dhe entitete të lidhura me Epsteinin.
Kthesa e presidentit erdhi pasi demokratët në Komisionin Mbikëqyrës të Dhomës së Përfaqësuesve publikuan javën e kaluar tre shkëmbime e-mailesh, përfshirë korrespondencën ndërmjet Epsteinit dhe bashkëpunëtores së tij afatgjatë Ghislaine Maxwell, e cila aktualisht po vuan një dënim 20-vjeçar për trafikim njerëzor për qëllime seksuale.
E kaluara e errët e Epsteinit dhe lidhjet me figura të njohura
Epstein ka qenë për shumë vite mik me Donald Trumpin, por presidenti ka deklaruar se marrëdhëniet e tyre u prishën në fillim të viteve 2000 – dy vjet para arrestimit të parë të Epsteinit. Trump ka mohuar vazhdimisht çdo përfshirje të tij në krimet e miliarderit.
Epstein u gjet i vdekur në qelinë e tij në Nju Jork në vitin 2019, një vdekje që u klasifikua si vetëvrasje. Në atë kohë ai ishte në paraburgim nën akuzat për trafikim dhe shfrytëzim seksual.
Më parë, në vitin 2008, ishte dënuar për nxitje në prostitucion.
Financieri dikur me ndikim të madh thuhet se ka pasur lidhje me shumë figura të rëndësishme, përfshirë:
-
Princ Andrew Mountbatten-Windsor, vëllai i mbretit Charles,
-
Donald Trump,
-
dhe një sërë personash të njohur nga bota e medias, politikës dhe argëtimit.
