Sipas një lajmi të gazetës Skala Times në pjesën greke të Qipros, i bazuar në debatet në rrjetet sociale, fshati Trozena në rajonin e Limassolit është blerë nga izraelitët.
GREKËVE U NDALOHET HYRJA NË KISHË
Në lajm thuhet se grekëve që shkonin në kishën e fshatit u është penguar hyrja.
Një polic që foli për gazetën konfirmoi se një sipërfaqe e madhe toke në rajon ka kaluar në pronësi të izraelitëve. Ai shtoi se nëse kisha mbetet brenda kufijve të një prone private, mund të vendosen kufizime për qasjen dhe madje mund të ndalohet hyrja.
“ASKUSH NUK MUND TË NDALOJË HYRJEN NË HAPËSIRË PUBLIKE OSE RRUGË”
Nga ana tjetër, polici theksoi se rrugët publike mund të përdoren lirshëm nga të gjithë qytetarët dhe deklaroi:
“Askush nuk mund të ndalojë hyrjen në një hapësirë publike ose në një rrugë. Nëse ndodh një rast i tillë, u bëjmë thirrje qytetarëve të kontaktojnë menjëherë policinë.”
ISH-DEPUTETI PERDIKIS U BËN THIRRJE AUTORITETEVE TË JAPIN SHPJEGIME
Ish-deputeti dhe kryetari i Lëvizjes së Ekologjistëve, George Perdikis, në një postim në rrjetet sociale tha se kanë marrë informacione se qasja e publikut në fshatin Trozena dhe në Kishën e Shën Gjergjit është ndaluar.
Perdikis deklaroi se një kompani e lidhur me Izraelin ka blerë shumë parcela dhe shtëpi në Trozena dhe se kompania ka shembur si objektet në pronësi të saj ashtu edhe ndërtesa të tjera.
Ai shtoi se kanë marrë ankesa dhe informacione sipas të cilave “kompania mbështetet nga drejtoria e urbanizmit dhe pushteti lokal, si dhe ka përdorur makineri pune për të hapur një shteg të vjetër.”
Perdikis tha se autoritetet janë informuar se kjo zonë, përfshirë edhe fshatin Trozena, ndodhet brenda një zone të mbrojtur dhe i bëri thirrje institucioneve të japin shpjegime publike.
Ai gjithashtu deklaroi se një fshat i braktisur turk në qytetin e Pafos ka tërhequr interesin e biznesmenëve nga vende të ndryshme, veçanërisht nga Izraeli, duke theksuar se pritet një deklaratë nga autoritetet lidhur me këtë çështje.
Në Qipro po shprehen shqetësime se shitjet e mëdha të tokave ndaj të huajve mund të ndikojnë në të ardhmen demografike dhe sociale të ishullit dhe se kjo çështje kërkon një reagim institucional sa më të shpejtë.
