Presidenti turk Recep Tayyip Erdoğan deklaroi se Evropa nuk mund ta injorojë më rolin kyç të Turqisë në sigurinë e kontinentit, duke theksuar nevojën për heqjen e “barrierave ideologjike” në mënyrë që të ndërtohet një kornizë reale dhe e qëndrueshme mbrojtjeje.
Duke folur me gazetarët në avion gjatë kthimit nga Etiopia, Erdoğan komentoi angazhimin aktiv të Turqisë në misionet dhe stërvitjet e NATO-s. Ai vuri në pah praninë e dukshme turke në një stërvitje të madhe të NATO-s në Gjermani, si dhe dërgimin urgjent të avionëve luftarakë F-16 për mbrojtjen e hapësirës ajrore të Baltikut.
Erdoğan theksoi se Turqia prej vitesh ka shprehur gatishmërinë për të kontribuar në strukturat e sigurisë evropiane.
“Ka ardhur koha që Evropa ta përfshijë Turqinë në mekanizmat e saj të mbrojtjes dhe sigurisë. Bota po ndryshon. Në këtë epokë transformimesh të shpejta, nuk është e kuptueshme që BE-ja të mbetet peng i agjendave të ngushta,” u shpreh ai.
Sipas tij, përjashtimi i Turqisë nga arkitektura e re mbrojtëse evropiane nuk është racional.
“Nëse synohet ndërtimi i një arkitekture të re mbrojtjeje në Evropë, është e qartë se ajo nuk mund të jetë e plotë pa Turqinë,” shtoi Erdoğan.
Turqia mori pjesë në stërvitjen e NATO-s në Gjermani me rreth 2.000 ushtarakë. Gjatë stërvitjes, droni luftarak Bayraktar TB3 operoi nga anija amfibe TCG Anadolu dhe goditi me sukses objektivat e caktuara.
Erdoğan nënvizoi se ushtria turke është ndër më të mëdhatë dhe më efektivet brenda NATO-s.
“Turqia nuk është një vend që vetëm flet në tryezë, por një vend që demonstron aftësitë e saj në terren,” deklaroi ai.
Në përfundim, Erdoğan shprehu bindjen se tashmë është gjerësisht e pranuar që një ekuacion i qëndrueshëm i sigurisë evropiane nuk mund të ndërtohet pa Turqinë.
