Më shumë se njëqind aktivistë të flotilës Global Sumud, e cila po transportonte ndihma për Gazën, janë zbarkuar në ishullin grek të Kretës. Flotila u ndalua nga forcat izraelite më shumë se 24 orë më parë në ujëra ndërkombëtare, ndërsa tani është bërë e ditur se dy aktivistë të njohur do të dërgohen në Izrael për t’u marrë në pyetje.
Sipas mediave izraelite, rreth 175 aktivistë, nën shoqërimin e rojes bregdetare greke, janë transportuar me katër autobusë drejt një qyteti të paidentifikuar, autoritetet e të cilit nuk janë bërë publike.
Ministria e Jashtme e Izraelit kishte njoftuar më herët se rreth 175 pjesëmarrës janë larguar nga më shumë se 20 anije në kuadër të operacionit për ndalimin e flotilës.
Organizatorët e flotilës thonë se në total kanë qenë 211 aktivistë.
“Në koordinim me qeverinë greke, personat e transferuar nga anijet e flotilës në një anije izraelite do të zbarkohen përgjatë bregdetit grek në orët në vijim”, ka deklaruar ministri i Jashtëm izraelit Gideon Sa’ar.
Ministri izraelit i Jashtëm falënderoi gjithashtu Greqinë për bashkëpunimin.
Edhe pse shumica e aktivistëve, sipas raportimeve, janë liruar dhe dërguar në territorin grek, ministria izraelite ka bërë të ditur se dy pjesëmarrës janë ndaluar dhe do të dërgohen në Izrael si të dyshuar.
“Saif Abu Keshek, i dyshuar për lidhje me një organizatë terroriste, dhe Thiago Avila, i dyshuar për aktivitete të paligjshme, do të sillen në Izrael për t’u marrë në pyetje”, thuhet në njoftimin e ministrisë.
Thiago Avila është një aktivist i njohur humanitar nga Brazili, i cili më parë ka fituar njohje ndërkombëtare. Saif Abu Keshek është një aktivist palestinez dhe një nga organizatorët e flotilës.
Autoritetet izraelite pretendojnë se të gjithë të ndaluarit e tjerë janë liruar.
Flotila ka publikuar një deklaratë për mediat, në të cilën dënon këtë veprim të Izraelit dhe kërkon reagim urgjent nga Kombet e Bashkuara për ndalimin e dy pjesëmarrësve.
Sipas të dhënave të monitorimit, flotila Global Sumud, e përbërë nga 58 mjete lundruese, ndodhej pranë ishullit grek të Kretës, qindra milje detare larg Izraelit, kur u përball me forcat izraelite.
Në përpjekjet e mëparshme për të sfiduar bllokadën detare, marina izraelite kishte ndaluar anijet shumë më afër brigjeve të Gazës, ku pritej që flotila të mbërrinte gjatë fundjavës.
