Të paktën 16 persona kanë humbur jetën, ndërsa më shumë se 20 janë plagosur në dy aksidente të ndara trafiku në provincat jugore turke Antalia dhe Burdur, si pasojë e motit me shi dhe mjegull në këtë zonë.
Aksidenti i parë ndodhi në Antalia, ku një autobus pasagjerësh doli nga rruga këtë mëngjes pasi nuk arriti të marrë një kthesë dhe u përmbys në një kanal.
Në këtë aksident humbën jetën nëntë persona, ndërsa 25 u plagosën.
Guvernatori i Antalisë deklaroi se 25 persona janë plagosur, disa prej tyre në gjendje kritike. Agjencia e lajmeve raportoi se gjatë aksidentit disa pasagjerë janë hedhur jashtë automjetit.
Antalia, e cila është një destinacion i madh turistik në bregdetin mesdhetar, ditët e fundit është përballur me reshje të dendura shiu.
Stuhi të forta kanë goditur disa zona të Antalisë, duke shkaktuar dëme të mëdha në disa rrethe.
Aksidenti i dytë fatal ndodhi në provincën tjetër jugore Burdur, ku dy automjete u përplasën ballë për ballë pranë tunelit Kazak në rrugën kryesore Antalia – Isparta.
Zyra e guvernatorit të Burdurit njoftoi se në këtë aksident kanë humbur jetën shtatë persona, ndërsa pesë janë plagosur.
