Izraeli njoftoi të mërkurën humbjet e tij më të rënda luftarake në më shumë se një muaj pas një prite në Rripin e Gazës.
Luftimet intensive midis Hamasit dhe ushtarëve izraelitë u zhvilluan në veri dhe jug të Gazës, një ditë pasi Kombet e Bashkuara bënë thirrje për një armëpushim të menjëhershëm humanitar.
Izraeli raportoi 10 ushtarë të vrarë në 24 orët e fundit, duke përfshirë një kolonel që komandonte një post dhe një nënkolonel që komandonte një regjiment. Kjo është humbja më e madhe njëditore që kur u vranë 15 ushtarë më 31 tetor.
Shumica e vdekjeve ndodhën në lagjen Shejaia të qytetit verior të Gazës, ku ushtarët u zunë pritë ndërsa përpiqeshin të shpëtonin një grup tjetër ushtarësh që sulmuan luftëtarët e Hamasit në një ndërtesë.
Hamasi tha se episodi tregoi se forcat izraelite nuk do ta nënshtrojnë kurrë Gazën.
“Sa më gjatë të qëndroni atje, aq më i madh do të jetë fatura e vdekjeve dhe humbjeve tuaja, dhe ju do të dilni prej saj duke mbajtur një bisht zhgënjimi dhe humbjeje, me dëshirën e Zotit,” tha Hamasi në një deklaratë.
Në një fjalim televiziv, shefi i Hamasit, Ismail Haniyeh tha se çdo marrëveshje e ardhshme në Gaza pa Hamasin është një “mashtrim”.
