Anëtarët e klubit socialdemokrat në Parlamentin Evropian (PE) kërkuan një hetim të pavarur të të gjitha parregullsive të raportuara gjatë zgjedhjeve të mbajtura në Serbi të dielën, më 17 dhjetor.
Konkretisht, grupi i socialistëve dhe demokratëve në Parlamentin Evropian i konsideron shqetësuese raportimet për vjedhjet elektorale.
“Zgjedhjet e së dielës në Serbi i sollën një tjetër fitore presidentit të vjetër Aleksandar Vuçiç dhe Partisë së tij Progresive Serbe në pushtet, por raportet e besueshme të mashtrimit zgjedhor dhe pretendimeve për dhunë të paprecedentë po shkaktojnë shqetësim serioz”, thotë grupi i dytë më i madh në parlamentin e Bashkimit Evropian.
Në një deklaratë të publikuar në faqen e saj të internetit, grupi i Socialistëve dhe Demokratëve thekson se “shpreh mbështetjen e tij të plotë për njerëzit në Serbi që kërkojnë drejtësi, demokraci dhe të ardhmen evropiane”.
Zëvendësi i tyre Andreas Schieder, anëtar i misionit në Parlamentin Evropian që vëzhgoi zgjedhjet në Serbi, tha se “është shqetësuese të lexohen raportet për mashtrime zgjedhore dhe përpjekjet e regjimit të Aleksandër Vuçiqit për të ndikuar në rezultate”.
“Vjedhja e votave, ryshfeti dhe korrupsioni nuk duhet të lejohen në një botë demokratike,” tha Schieder.
Ai deklaron gjithashtu se ata janë “jashtëzakonisht të shqetësuar për presionin e raportuar ndaj votuesve, gjuhën e urrejtjes në fushatë, ngacmimin e gazetarëve dhe shoqërisë civile në Serbi, keqpërdorimin e burimeve administrative dhe ndërhyrjet dhe manipulimet e mundshme me qëllim të keq ruse ose të huaja”.
“Ne jemi veçanërisht të shqetësuar për akuzat për mashtrim (në zgjedhje) në Beograd, të cilat mund të kenë vjedhur fitoren nga opozita,” shton Schieder.
Pavarësisht nga të gjitha shqetësimet, shtoi Schieder, socialistët dhe demokratët ende shpresojnë se Serbia mund të tregojë përkushtim të vërtetë në rrugën e saj drejt BE-së.
Parregullsitë zgjedhore janë vënë në dukje nga misionet vëzhguese vendore dhe ndërkombëtare që kanë monitoruar mbajtjen e zgjedhjeve në Serbi, dhe gjithçka i referohet para së gjithash ardhjes së qytetarëve nga Bosnja dhe Hercegovina për të votuar në Beograd.
